Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, kazu foun ne’ebé rejista ohin, iha Kapital Dili numeru boot liu kompara ho Munisipiu sira seluk.

Husi kazu detetadu 42 ne’e, iha Dili kazu 22, Baukau kazu 4, Bobonaro kazu 1, Lautem kazu 4, Manufahi kazu 5, RAEOA kazu 5 no Vikeke kazu 1.

“Husi totál kazu detetadu foun ohin, kazu 17 ka 40,4% mak hatudu sintomas, kazu 5 ka 12% simu ona vasina kompletu no kazu 5 ka 12% simu ona vasina doze dahulu,”dehan nia iha komunikadu ne’ebé Online INDEPENDENTE asesu sabado ne’e.

Aleinde, SIJK mós rejista pasiente ne’ebé rekupera husi Covid-19 iha na’in 103 no kazu ativu ne’ebé baixa hela iha Izolamentu hamutuk 1. 045.

Enkuantu, total komulativu kazu konfirmadu sura husi loron 21 fulan-Marsu tinan 2020 to’o loron 25 fulan-Setembru tinan 2021 hamutuk 19.350.

Entretantu, ba kazu mate, Rui informa, sidadaun Timor-Oan na’in ida simu ona vasina AstraZeneca doze kompletu no ida seluk iha formasaun kona ba vasina seidauk klaru.

Kazu dahuluk, feto ho idade 59, hela iha Dili, vasina kompletu (AZ), iha loron 5 Setembru 2021, diagnóstikadu sindroma insufisiénsia respiratória aguda (SIRA) tanba Covid-19. Iha loron ne’e kedas hala’o tratamento iha Lahane. Nune’e, iha sesta (24/09) kalan iha tuku 19.30 pasiente hakotu-iis.

“Familia kolabora ona ho ekipa saúde atu halo funeral tuir protokolu ne’ebé adopta iha Timor-Leste,”dehan Rui.

Kazu daruak, mane ho idade 54, hela iha Manatuto, informasaun kona ba vasina seidauk klaru, iha 24 setembru 2021, diagnóstikadu sindroma insufisiénsia respiratória aguda (SIRA) tanba Covid-19. Iha loron ne’e kedas hala’o tratamentu iha Izolamentu Lahane. Nune’e, iha sesta (24/09) kalan, tuku 23.55 pasiente hakotu-iis.

Tamba ne’e,  família kolabora ona ho ekipa saúde atu hala’o funeral tuir protokolu ne’ebé adopta iha Timor-Leste.

Ho nune’e, total kazu ema ne’ebé mate ho Covid-19 iha TL hamutuk 113.