Ohin, EBC 10 Dezembru Realiza Ezame Daruak

By Adelaide dos Santos Setembru 27, 2021 384
Estudante sira tuir hela Ezame. Foto:Dok. Estudante sira tuir hela Ezame. Foto:Dok.

DILI: Ohin, eskola Ensinu Báziku Sentrál (EBC) 10 de Dezembru, realiza ezame daruak nian, tanba hetan ona autorizasaun husi Ministériu Edukasaun Juventude no Desportu (MEJD), hodi reativa ensinu aprendijazen prezensiál.

Diretór eskola, Calistro Guterres, hateten eskola nee hetan ona autorizasaun husi MEJD hodi reativa atividade ensinu aprendizazen, tanba maioria professór simu ona vasina.

“Segunda, 27 setembru ita realiza ezame daruak, nunee prepara ba ezame nasionál,” nia hateten iha  Komoro, Sesta (25/09).

Totál estudante iha ensinu Báziku Sentral 10 de Dezembru ba tinan ida nee hamutuk 1.038 ho totál professór hamutuk 53.

Husi númeru nee, professór hamutuk 48 mak simu ona vasina no  professor nain lima mak seidauk simu vasina.

Professór nain lima neebé mak seidauk simu vasina nee tanba nain tolu sofre moras estroke, no nain rua moras kumplikadu, tanba nee sira hatoo ona dadus ba iha MEJD.

Ministériu Edukasaun Juventude no Desportu (MEJD) liu husi edukasaun munisipiu Dili, halo ona observasaun katak iha eskola hamutuk 99 mak prienxe ona kritéria prinsipál hanesan vasina Covid-19, no preparadu atu reativa aula prezensiál.

Rate this item
(0 votes)

Independente Digital TV