DILI: Hahú fulan-Dezembru 2017 obrigatoriu ba sidadaun hotu-hotu ne’ebé utiliza kartaun telemovel (sim card) ba operadór tolu, iha obrigasaun rejista sim card. Bainhira la rejista, kartaun ne’e dezativa.

Iha fulan ne’e nia laran pensaun polítika iha Península Koreia sa’e makaas. Nasaun rua Estadus Unidus Amérika (EUA) ho ninia aliadu sira hatudu ona sinál atu mosu funu guerra mundiál.

Koreia mós ameasa atu tiru nukleár ida ba Austrália relasiona ho deklarasaun husi governu rai ne’ebá nian.

Nune’e, iha Timor-Leste foun lalais aviaun apoiu funu Amérika nian ida aterra (tuun) iha Dili. Karik Timor-Leste bele hetan impaktu husi prezensa aviaun ne’e?

Hakarak hatene kle'an liu kona-ba asuntu ne’e, tuir mai Jornál INDEPENDENTE (JI) halo entrevista eskluzivu ho dosente Universidade da Paz (UNPAZ), Filipe Rodrigues Pereira (FRP), iha Dili, horisehik.

Jornál INDEPENDENTE (JI): Tensaun polítika iha Península, Koreia Norte sa’e maka’as ona. Tuir Ita Boot iha poténsia akontese duni III Guerra Mundiál?

Filipe Rodrigues Pereira (FRP): Haree ba movimentasaun militár ho númeru boot no arma pezada (inklui ró-ahi funu, avioins funu) iha rejiaun ne’ebá, maka laiha ema ida mak bele garante 100% katak sei la akontese funu entre Estadus Unidus Amérika (EUA) no ninia aliadu ho Koreia Norte no ninia aliadu sira, ne’ebé ikus hada’et ka fó impaktu ba nasaun seluk iha mundu tomak. Nasaun sira iha mundu direta no indireta sei sofre konsekuénsia funu ne’e nian, konsekuénsia polítika, sosiál, ekonómika no seluk tan.