Domingu, 21 Outubru 2018 | Login
SEKomS Mericio Juvinal Akara SEKomS Mericio Juvinal Akara

SEKomS Akara Vizita Jornal INDEPENDENTE Featured

DILI: Sekretáriu Estadu Komunikasaun Sosiál (SEKomS) Mericio Juvinal Akara hala’o vizita ba edifisiu jornál INDEPENDENTE hodi bele haree direitamente kondisaun no rona preokupasaun ne’ebé jornál ne’e iha.

SE Akara dehan, iha nia mandatu tinan lima hakarak halo parseiru ho média nasionál sira, tantu media estadu nian no privadu.

“SEKomS nia relasaun ba média hotu hanesan no laiha ida mak atu espesial liu, tanba ita hanoin media ne’e meius ba komunikasaun social, entaun media hotu iha nia knaar atu kontribui tuir nia área,” dehan Sekretariu Estadu ne’e bainhira hala’o vizita iha edifisiu Jornál INDEPENDENTE, Hudi-Laran, Tersa (17/07).

Tuir Akara, vizita hanesan ne’e importante atu kria komunikasaun ba malu nune’e SEKomS bele hatene problema ne’ebé media sira hasoru no media sira mós bele hatene politika no programa ne’ebé SEKomS hakarak atu implementa.

“Kuandu laiha komuniksaun ba malu mak (SEKomS) sei la hatene media sira ne’e hanoin oinsa no (media sira la hatene) SEKomS nia planu, programa, entaun koalia kona-ba kolaborasaun ne’e konfuzaun,” dehan nia.

SEKomS nia planu, nia informa, mak atu dezenvolve meius komunikasaun sosial hotu, tantu media estadu nian no privadu.

Ba media estadu nian, Akara dehan, sei tau prioridade atu hadia di’ak liu tan iha nivel infraestrutura, ekipamentu, jestaun no seluk tan.

Ba media privadu, Akara dehan, media privadu hanesan parseiru importante governu nian tan ne’e presiza kolabora ba malu hodi bele dezenvolve di’ak liu tan.

Iha ninia vizita, Akara sente orgullu mós ho ezistensia jornál INDEPENDENTE ne’ebé maske enfrenta difikuldade oioin maibé konsege dezenvolve an sai di’ak liu tan.

“Ita tenke orgullu Jornál ne’e ezisti ona iha tinan hitu ho ninia kapasidade no rekursu rasik, tanba ne’e ita haree ba grafiku ne’e hatudu pozitivu tebes,” dehan Akara.

“Ha’u hanoin ho vizita sira hanesan ne’e no komunikasaun sira ne’e hanesan hahu prosesu ida katak ita bele buka pontus ne’ebé bele halibur ita iha intesaun ida ne’ebé mai ho interese ne’ebé hanesan,” katak nia.

Iha fatin hanesan Diretór Jornál INDEPENDENTE José Sarito Amaral informa kona-ba dezafiu no difikuldade ne’ebé jornál INDEPENDENTE hasoru durante ninia ezistensia tinan hitu (7).

Tuir Sarito parseiru ho governu importante tebes ba ezistensia kompaña media, liliu jornál, tanba hotu-hotu iha dependensia ba governu.

“Publiku hotu hatene katak jornál hotu dependensia ba governu, kuaze porsentu 85. Se laiha koopersaun di’ak mak media balun sei lulun biti,” dehan nia.

Tan ne’e, ho vizita husi SEKomS, Sarito hein katak sei lori mudansa pozitivu ba kooperasaun ne’ebé durante ne’e jornál INDEPENDENTE halo ona ho instituisaun governu sira.

Read 808 times Last modified on Kuarta, 18 Jullu 2018 18:37
Rate this item
(0 votes)