Sexta, 18 Outubru 2019 | Login
Xanana, Taur ho Alkatiri Xanana, Taur ho Alkatiri

Segredu Entre Xanana, Alkatiri ho Lú Olo: Lakohi FRETILIN Bolu PLP no KHUNTO Featured

BAUKAU: Primeiru Ministru, Mari Alkatiri sobu sai dialogu ‘segredu’ ne’ebé Prezidente Repúblika, Francisco Guterres Lú Olo hala’o ho Prezidente Partidu CNRT, Kay Rala Xanana Gusmão no Alkatiri rasik antes atu kria formasaun VII Governu Konstitusionál.

Alkatiri dehan, bainhira Prezidente Lu-Olo bolu nia (Alkatiri) ho Xanana hanesan lider nasionál hodi husu hanoin no diskute kona-ba modelu formasaun VII Governu Konstitusional, iha altura ne’ebá Xanana rasik lakohi atu FRETILIN forma governu hamutuk ho Partidu Libertasaun Populár (PLP) ne’ebé lidera husi Taur Matan Ruak no partidu Kmanek Haburas Unidade Timoroan (KHUNTO).

Alkatiri konta, iha diálogu, Xanana prefere liu FRETILIN atu forma governu hamutuk ho Partidu (PD) tanba Xanana garante governasaun la’o sei la mosu problema iha dalan klaran.

iha diálogu segredu ne’ebé taka ba média ne’e mós, Xanana mós deklara antes ona katak, CNRT lakohi tama iha estrutura governu hodi hili dalan sai opozisaun iha Parlamentu Nasionál.

Nune’e, molok hasoru malu ho PR, iha kontaktu malu antes nune’e, Xanana Gusmão mós informa katak bainhira FRETILIN avansa koligasaun ho PLP ho KHUNTO sei mosu konfuzaun boot.

“O (Alkatiri) ba ho Taur Matan Ruak o nia ulun fatuk sei moras, tanba ha’u koñese nia (Taur) didi'ak, nune’e o ba ho KHUNTO (mós) o sei moras,” deklara Alkatiri iha diálogu aberta ho povu no autoridade lokál  Munisípiu Baukau, Sesta (23/3).

 Xefe dehan, hafoin rona tiha Xanana, ikus mai FRETILIN mós nonok hodi deside forma governu hamutuk ho partidu PD.

Alkatiri hatutan, durante diálogu ne’e, nia rasik ho PR mós nonook no laiha resposta hasoru Xanana.

Iha diálogu sira na'in tolu promete sei la fó sai segredu diálogu ne’e, tanba sira fiar katak, too tempu ida lider nasionál sira sei hamutuk hodi hadi'a nasaun no povu nia vida moris.

Tanba ne’e ba povu Baukau, Alkatiri dehan, tuir loloos segredu diálogu ne’e nia labele fó sai, maibé tanba FRETILIN forma tiha governu hamutuk ho PD, ikus Xanana lori CNRT ba hamutuk ho PLP no KHUNTO forma Bloku Aliansa Progresu ba Mudansa (AMP) hodi tenta hamonu governu, nune’e too ikus PR Lú Olo foti desizaun disolve PN hodi deside ba Eleisaun Antesipada atu povu mak deside podér foun ba partidu ne’ebé merese atu forma fali governu foin mai.

Alkatiri dehan, too agora nia rasik konfuzaun ho Xanana nia polítika, tanba deklara iha diálogu oin seluk too ikus lasu tiha FRETILIN no PD halo koligasaun iha kotuk Xanana mós forma AMP atu hamonu fali governu.

Entretantu too notisia ne’e, hatun diariu ne’e seidauk halo konfirmasaun  Prezidente CNRT, Xanana Gusmao tanba hala’o hela viazen ba Manatutu.

Read 12237 times Last modified on Domingu, 25 Marsu 2018 11:55
Rate this item
(0 votes)

About Author

MidAd1