Sábadu, 23 Setembru 2017 | Login
Peskizadór La’o Hamutuk, Juvinal Dias Peskizadór La’o Hamutuk, Juvinal Dias

Promesa Parpol Fó Perigu Ba Povu Featured

DILI: Promesa sira ne’ebé partidu polítiku sira halo iha tempu kampaña eleitorál bele sai boomerang ba povu. Tanba partidu sira halo promesa oioin ho intensaun atu ukun, maibé la haree ba espetativa realidade finanseiru Estadu nian.

Orsamentu Jerál Estadu (OJE) Timor-Leste nian durante ne’e dependénsia makaas liu ba fundu petrolíferu, maibé durante ne’e partidu polítiku sira kaer ba fundu ne’e hodi halo promesa oioin ba povu. Signifika, sei lori Estadu Timor-Leste ba perigu nia laran tanba produsaun mina-rai besik mout ona.

Peskizadór La’o Hamutuk, Juvinal Dias hateten, partidu polítiku sira lalika halo promesa barak iha tempu kampaña atu hasai osan husi fundu petrolíferu para atu trata kondisaun veteranu no fó servisu barak ba povu Timor-Leste, tanba programa no polítika ne’e lori hela ameasa boot ba fundu petrolíferu.

“Partidu polítiku sira hanesan ne’e mak ukun karik saida mak akontese? Fundu petrolíferu bele hotu. Uluk Timor-Leste iha Kitang maibé agora laiha ona”, tenik nia iha salaun Kanosa Haas-Laran, Bekora, horisehik.

Ne’e duni, nia husu ba polítiku na'in sira atu haree fundu petrolíferu ne’e hanesan rekursu Timor nian, labele haree hanesan ema seluk nian, atu nune’e, labele gasta osan arbiru ba buat ne'ebé laiha valór hanesan pensaun vitalisia no sosa karreta prado.

Nia bolu atensaun ba jerasaun foun sira atu labele husik de’it ukun na’in sira gasta osan konforme sira nia hakarak, tanba laiha ona balansu entre despeza Estadu no rendimentu petrolíferu nian. Ne'e duni, lalika mehi fundu petrolíferu atu benefísiu povu nia moris.

Nune’e, Juvinal dehan, karik fundu ne’e hotu tiha ukun na’in sira ne'ebé iha osan bele kontinua moris no haruka sira nia oan sira ba eskola nafatin.

Nune'e, osan husi fundu petrolíferu ne’e kuaze fó benefísiu ba kompañia internasionál de’it. Realidade hatudu projetu boot sira ne'ebé la’o daudaun iha nasaun ne’e mesak kompañia internasionál mak kaer.

Ukun na'in sira ohin loron, hanoin mak gasta osan de’it maibé la hanoin ba povu nia moris, hanesan jerasaun foun tenke fó hanoin ba sira katak polítika ne'ebé sira halo sei lori todan ba futuru jerasaun foun nian.

Tuir Juvinal, Timor-Leste iha dalan perigu nia laran, tanba dependénsia orsamentu Estadu nian mai husi fundu petrolíferu maibé re-tornu ekonómiku sei ki’ik.

“Kada tinan transferénsia osan boot liu kompara ho reseita re-tornu investimentu fundu petrolíferu. Ida ne’e hatudu katak despeza Estadu diferensa ho realidade”, dehan nia.

Maski nune’e, nia dehan, finanseiru Estadu Timor-Leste bele rekupera hikas bainhira bele halo produsaun ba mira-rai iha área Greater Sunrise nian.

Juvinal hatutan, re-tornu fundu naun petrolíferu ki’ik liu kompara husi osan ne'ebé mai husi mina no gás. Haree husi gráfika ne'ebé iha re-tornu husi mina no gás to’o 2018 uitoan liu ho dependénsia orsamentu husi fundu petrolíferu nian.

Peskizadór ne’e dehan, dékada rua ikus ne’e governu fó lisensa halo perfurasaun mina matan iha área eskluzivu tasi timor bloku C besik Suai no bloku K besik Jaco mina laiha. Ne’e hatudu katak, TL nia rekursu mina-rai limitadu.

Nia hatutan, Bayu Undang iha nivel produsaun másimu iha 2014 ne’ebé hetan fundu boot l, maibé agora fundu mina-rai menus ona husi 4%, entaun produsaun ne’e sei tun makaas liu tan.

Reseita Fundu Petrolíferu Fó Prósperu Ba Povu

Entretantu, Koordenadór Unidade Ministériu Administrasaun Fundu Petrolíferu Filipe Nerio hateten, polítika governu ba reseita no investimentu fundu mina-rai nian atu fó benefísiu ba povu timoroan hotu-hotu.

Nia hatutan, benefísiu la'ós ba jerasaun agora de’it maibé mós ba jerasaun futuru. Signifika katak, bele haree oinsá rai osan ne’e ba jerasaun futuru sira.

Nia dehan, esperiénsia barak akontese iha nasaun seluk sai ona referénsia ba Estadu Timor-Leste nian agora no iha futuru.

“Ita evita situasaun ne’ebé gastu makaas no reseita makaas. Ko'a gastu bainhira reseita tun”, tenik nia.

Nia esplika, hasai konsumu osan ne’e tenke la’o ho di’ak, labele iha frustrasaun iha gastu sira ne’e.

Read 395 times
Rate this item
(0 votes)
  • MidAd1
  • Heineken Klaran
AdBottom1