Tuir perspetiva Xefe Estadu Maiór Jenerál FALINTIL-Forsa Defeza Timor Leste (F-FDTL), Majór Jenerál Lere Anan Timur, veteranu na’in tolu ne’e mak figura ba nasaun Timor Leste. Ne’e duni, sira mak la’o kobre rai laran situasaun mós hakmatek.

“Ha'u haree kampaña balun prezensa sira nian ne’e Xanana mosu iha fatin ida, FRETILIN mós simu, PD mós simu mundu hotu-hotu simu. Taur Matan Ruak mós hanesan kuandu nia mosu iha ne'ebé, FRETILIN mós simu, sira CNRT mós simu, PD mós simu, ninia partidu mós simu. Hanesan mós Mari Alkatiri ho Lú-Olo”, tenik nia, hafoin soru-mutu ho Prezidente Repúblika, Francisco Guterres ‘Lú-Olo, iha Palasiu Prezidensiál, horisehik.

Tanba ne’e, husi eis-gerrilleiru ne’e, la'ós sira nia partidu de’it mak simu. Ne’e duni, kuandu ema la hatene informasaun, ema hanoin sira nia ema partidu nian mak barak hanesan ne’e, afinál laiha. Kuandu vota ne’e fahe ba tolu ona. Tanba, sira na’in tolu ne’e mak símbolu unidade nasionál.

Tanba ne’e, situasaun iha nivel nasionál di'ak, tanba figura na’in tolu mak la’o iha Timor laran hodi hala’o kampaña polítika, hanesan Xanana Gusmão, Taur Matan Ruak no Mari Alkatiri, inklui mós Lú-Olo.

Tuir nia, kuandu ema katuas sira sei moris, povu sira la haree ba programa polítika, maibé haree ba figura.

Lere esplika, ema atu ukun nasaun ne’e, tenke ema ida ne'ebé iha nasionalizmu maka’as atu serve rai no povu ne’e. Signifika, tenke hadomi ninia rai no povu.

Ne’e duni, Lere husu ba povu Timor-Leste tomak, labele duvida bainhira figura na’in tolu ne’e serve rai no povu ne’e. Tanba sira na’in tolu hatudu ona ba mundu katak durante tinan 24 nia laran ho sira nia esforsu mak Timor hetan independénsia.