FRETILIN Hetan Ona Membru Governu Balun Featured

By INDEPENDENTE Agostu 08, 2017 4861
FRETILIN FRETILIN

DILI: Partidu FRETILIN hetan ona ema balun ne’ebé atu tama iha estrutura VII Governu Konstitusionál.

Ema ne’ebé partidu mais votadu ne’e prefere liu mak Kay Rala Xanana Gusmão, atuál Ministru Planeamentu no Investimentu Estratéjiku (MPIE).

“Ha’u hatene katak Xanana Gusmão figura ida ne’ebé labele sai husi governu”, dehan Sekretaria Jerál FRETILIN, Mari Alkatiri, hafoin reuniaun Komisaun Polítika partidu FRETILIN, iha Comité Central FRETILIN (CCF), Komoro-Dili, horisehik.

Kona-ba pozisaun ne’e rasik, partidu FRETILIN kontakta ona partidu CNRT hodi diskute hamutuk mós kona-ba formasaun governu foun nian. Inklui sei halo diskusaun partikularmente ho Prezidente Partidu CNRT.

Ne’e duni, partidu FRETILIN rasik kontinua hein desizaun finál husi Xanana Gusmão. Nune’e, sei respeita desizaun hotu-hotu ne’ebé Xanana foti.

Kona-ba rezolusaun CNRT nian, Sekretaria Jerál FRETILIN lee ona, maibé ko’alia hamutuk hodi bele hetan entendimentu finál.

Tuir planu, reuniaun entre FRETILIN ho CNRT sei halo iha, Tersa (8/8), ohin no kontinua ba Kuarta (9/8).

Nune’e, kontinua kontakta mós partidu sira seluk hanesan Partidu Demokrátiku (PD) no KHUNTO iha Segunda (14-15/8).

Partidu FRETILIN rasik agora daudaun iha ona ideia kona-ba estrutura no estatutu governasaun foun nian, maibé labele la’o ho ideia ne’e tanba presiza atu diskute hamutuk ho partidu polítiku sira seluk ne’ebé hetan asentu iha Parlamentu Nasionál.

Mari hein katak, iha reuniaun ho partidu polítiku hirak ne’e hetan ona serteza ba kompozisaun governu foun nian, molok loron 18 fulan ne'e.

Envolve Ema CNRT iha Governu Foun

Iha fatin ketak, Vise-Prezidente FRETILIN, Francisco Miranda Branco hateten hateten, FRETILIN sei loka nafatin dalan ba ema husi CNRT atu envolve iha formasaun governu foun mai.

Nia esplika, Timor iha partidu rua mak boot FRETILIN no CNRT. Partidu CNRT deklaramente sai ona opozisaun iha parlamentu nasionál, maibé ho espíritu nasionalizmu FRETILIN halo deklarasaun husu CNRT nia ema balun envolve-aan iha VII Governu Konstitusionál.

“Ha'u hanoin iha panorama partidu boot CNRT reflete duni sentidu Estadu, tanba maski sai opozisaun maibé interese nasionál bele envolve mós iha governu ne’e. Ha’u hanoin governu ne’e sei sai forte no buras iha mandatu tinan lima oin mai”, dehan nia, iha Uma Fukun PN, horisehik.

Branco esplika, partidu FRETILIN iha hanoin atu adapta governasaun saida de'it, maibé importante povu hakmatek kaer metin nafatin unidade nasionál. Tanba ne’e, VII Governu ne’e sei nakloke-aan ba ema hotu atu bele kontribui dezenvolve nasaun ne’e.

Entretantu, iha parte seluk, partidu FRETILIN kontinua halo aprosimasaun ho partidu polítiku hotu-hotu hodi diskute formasaun VII Governu ne'ebé buras liu. Nune’e, bele halo dezenvolvimentu ba povu no nasaun iha futuru.

Vise-Prezidente hatete, aprosimasaun no kontaktu polítiku ho partidu sira ne'ebé hetan asentu iha Parlamentu Nasionál komesa la’o ona, maibé seidauk iha rezultadu.

“Maizumenus iha semana ne’e nia laran públiku bele hatene ona informasaun kona-ba formasaun VII Governu”, tenik nia.

Nia hatutan, situasaun agora klaru liu ona, atu loke odamatan nune’e semana ne’e nia laran bele klarifika di'ak liután ba públiku.

Rate this item
(0 votes)

Independente Digital TV