Taur Hahú ‘Entrega Podér’ Ba Agio no Sara Redús Orsamentu Featured

By Dezembru 07, 2019 3312
PM Taur Matan Ruak PM Taur Matan Ruak

DILI: Xefe Governu, Taur Matan Ruak, fó kompeténsia servisu ba ministru na’in rua hodi halo elaborasaun ba Orsamentu Jerál Estadu (OJE) tinan fiskál 2020 ne’ebé retira husi Parlamentu Nasionál.

Ema hirak ne’ebé hetan konfiansa husi Primeiru Ministru maka, Ministru Prezidénsia Konsellu Ministru, Hermenegildo ‘Agio’ Pereira no Ministra Finansas, Sara Lobo Brites.

Nune’e, enkontru hahú hala’o ona, iha Kuarta (4/12), entre ministru na’in haat hodi hahú haree kona-ba redusaun orsamentu nian. Ministru hirak ne’e maka Ministru Prezidénsia Konsellu Ministru, Ministra Finansas, Ministru Transporte Telekomunikasaun, Ministra Edukasaun Juventude No Desportu.

Rejimentu parlamentu fó dalan ba dada orsamentu, nune’e governu sei halo revizaun hodi bele hamenus orsamentu tuir pedidu Parlamentu Nasionál nian.

“Ami sei hatama fali orsamentu ki’ik. Seidauk bele dehan nia númeru… Nune’e, sei haree loron 13 aprezenta fila-fali”, dehan nia, iha Palasiu Governu, horisehik.

Posibilidade verba sira ne’ebé sei hatún maka bens servisu, liuliu kategoria viajen estranjeiru no mós fundu rezerva..

Nia dehan, proposta orsamentu bens servisu ba tinan 2020 tau tokon USD $700. Númeru ne’e boot tanba iha projetu barak iha laran hanesan sosa ró ahi ba marítima ne’ebé sei hasai ba fundu kontrapartida.

Reuniaun iha Palasiu Governu kontinua la’o normál hanesan baibain, maibé situasaun ministru sira nian la baibain. La hatudu oin midar hanesan loron sira seluk. Barak liu husi ministru sira ne’e ‘murón’ no ladún hamnasa.

Rate this item
(0 votes)

Independente Digital TV