Primeiru Ministru enkoraza populasaun atu he’in prosesu hotu-hotu ne’ebé oras-ne’e daudaun la’o hela no projetu konstrusaun estrada ba postu administrativu ne’e sei to’o duni iha fulan balun tan.
“Ne’e duni agora daudaun prosesu bá konstrusaun estrada Gleno mai Letefoho la’o hela, tanba tenke haree didi’ak hodi halo uluk estudu ba buat barak molok implementa. Tenke haree didi’ak ninia kualidade, kalkulasaun bá distánsia no alokasaun orsamentu, tanba osan ne’e povu nian. Maibé atu dehan bá imi katak, estrada hosi Gleno sei mai duni to’o Letefoho,” dehan Komunikadu ne'ebé Online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Tersa (24/06)
Primeiru Ministru husu bá populasaun atu kolabora ho Governu bainhira implementa projetu konstrusaun estrada ne’e iha tempu balun mai.
Iha fatin hanesan Xefe Planeamentu MOP, Tito Edgar hateten, MOP halo normalizasaun ba estrada hosi Gleno bá to’o Letefoho tanba ezijénsia hosi populasaun, liu-liu atu fasilita movimentu transporte públiku.
Ho ezijénsia populasaun ne’e maka Ministru Obras Públikas, Samuel Marçal husu rasik ba Primeiru Ministru, atu halo normalizasaun no Xefe Governu mós konkorda katak tenke halo duni, nune’e provizoriamente bele fasilita movimentu transporte públiku hodi he’in prosesu tenderizasaun bá konstrusaun.
“Ita haree kondisaun grave tebes. Ezemplu agora daudaun tempu kú kafé, sira atu tula de’it kafé mai Dili ho kuantidade tonelada lima to’o neen labele. Ho razaun ida ne’e maka ita halo normalizasaun hodi hein prosesu tenderizasaun bá konstrusaun iha Comissão Nacional Aprovisionamento (CNA) durante fulan ualu seidauk konklui,” Tito Edgar hateten.
Xefe Planeamentu MOP ne’e dehan, prosessu normalizasaun la’o lais tebes tanba durante iha terrenu, ekipa traballu hetan akompañamentu direta no korazen hosi Ministru Obras Públikas.
Nune’e mós Pároku, Parókia Nossa Senhora do Carmo Letefoho, Padre Élio Pereira Fernandes observa katak, komunidade kontente tebes bá normalizasaun estrada ne’e. Loos duni, populasaun kontente tanba durante ne’e estrada grave tebes, bee nalihun, rai ku’ak barak, difikulta duni movimentu populasaun.
Pároku ne’e louva no agradese bá Governu liu-hosi Ministru Obras Públikas, Samuel Marçal ne’ebé tun direta hodi akompaña ekipa durante tempu tomak, no normalizasaun ne’e la’o lais tebes.
“Ida ne’e hatudu katak, Governante ne’e iha duni vontade bá kompromissu atu responde preokupasaun populasaun iha área rurál. Populasaun mós kontente ho esperansa boot bá Governu katak, sei implementa duni projetu konstrusaun estrada tama to’o Letefoho,” Padre Elio hateten.
Normalizasaun ne’e hahú kedan hosi Gleno bá Humboe, Eraulu tama to’o Letefoho ho totál kilómetru 38 ne’ebé tuir planu sei konklui iha loron rua tán.
Prosesu normalizasaun ne’e, ekipa traballu Ministériu Obras Públikas utiliza ekipamentu hosi Instituto de Gestão de Equipamentos e Apoio ao Desenvolvimento Infrastruturas, Instituto Publico (IGEADI, IP).
