Tuir Xefe Suku Bebonuk Alfredo da Costa hatete, tuir lolos fundador ho rai nain tenke tur hamutuk hodi resolve problema ne’e, labele abandona estudante sira.

Tanba ne’e, nia parte hamutuk ho inan-aman no estudante sira loke hikas portaun eskola nian hodi reativa fali prosesu aprendijazen, nune’e estudante sira bele tuir prosesu aprendijazen no prepara ba ezame segundu periodu nian.

“Hanesan autoridade lokal, ohin ha'u mai hamutuk ho portavoz inan aman no mós estudante sira, ami mai loke odamatan atu labarik sira bele tuir prosesu aprendizazen, labele abandona labarik sira no impata labarik lubun boot ne’e nia futuru,”dehan nia ba Jornalista sira iha área Eskola Rainha da Paz, Bebonuk, segunda (23/06/25).

Nia dehan, kona ba manorin sira, dadaun ne'e iha ona manorin balun ne’ebé pronto hanorin estudante sira.

“Ha'u la’os mai atu halo politika iha ne'e, maibé hanesan autoridade lokal, ha'u lakoi labarik sira nia inan aman lorloron mai iha sede suku ne'ebá para ezije hela de'it dehan sira nia oan la eskola,"tenik Xefe Suku.

Iha fatin hanesan, Portavoz Inan-Aman, José Manuel Ximenes hatete, hanesan portavos inan-aman kordena ho autoridade lokal iha Suku Bebonuk hodi normaliza fali prosesu aprendijazen.

Nune’e mós, nuudar portavos hakarak husu ba Ministeriu Edukasaun atu bele buka solusaun ba problema ne’ebé durante ne’e estudante sira hasoru.

“Ami kontinua buka solusaun to'o iha Ministeriu Edukasaun nasional, atu bele fó solusaun ba problema ne'e, ami nafatin kordena hamutuk ho autoridade local, na’in xefe suku ho nia estrutura hodi normaliza fali prosesu aprendijazen,”dehan Portavós.

Entretantu, hatan ba preokupasaun sira ne'e, Rai Na'in no mós hanesan manorin João Loe, hatete, problema sira ne’ebé durante ne’e mosu iha eskola refere, prosesu hotu entrega ona ba iha parte relevante sira liliu Servisu Edukasaun Munisipiu Dili nian.

"Problema hotu-hotu ne'ebe mak mosu, ami entrega ona ba Eduksaun Munisipal hodi tuir prosesu, aleinde ami hein hela prosesu sira, ami mós hetan ezizensia husi inan-aman no estudante sira, lider autoridade lokal sira, atu bele loke hikas portaun ne'e, atu normaliza fali aula, komesa ohin ba oin, ami sei hamos fatin ne'e no komesa aban ba oin ami sei hanorin estudante sira tuir kapasidade ne’ebé maka ami iha,”hakotu nia.