Sekretáriu Estadu Asuntu Toponimia Organizasaun Urbana (SEATOU) Germano Santa Brites Dias husu populasaun sira iha Dili laran atu tau lixu iha nia fatin, no konvida Kompañia Caltech ba foti.
"Populasaun sira iha Dili laran tau lixu iha nia fatin, ka ba sira ne'ebé iha transporte bele mai fa'an rasik de'it ba Caltech ou konvida Kompañia Caltech ba foti para plastik no botir sira labele soe estraga deit tanba nee osan, sunu no baku rahun depois estraga deit ambiente maibé tau hamutuk hodi bolu Caltech ba sosa depois bele hetan fali osan, atu nune’e oituan ka batak ita bele kontribuiona ba ambiente ita nian," dehan Sekretáriu Estadu iha resintu Kompañia Caltech Beduku Komoro, Tersa (24/06).
Governante ne’e hatutan, hirak ne’ebé sira tenki tau lixu hamutuk inklui loja sira iha kapital Díli tenki tau sira nia lixu hamutuk atu nune’e fó hatene saneamentu munispiu Dili atu nune’e lori ba Caltech hodi hetan osan.
Iha fatin hanesan, Jerente Kompañia Caltech, Rogério Hornai hatete, Kompañia dadaun ne'e seidauk sosa lixu maibé sei hare liu ba iha Intensivu ba ema sira ne'ebé kolleta lixu plastiku ne'ebé ho montante kada sentavus 0,8 ka tonelada ida dolar amerikanu $80//
"Agora dadauk ami hare liu ba intensive, ami seidauk hola maibé ami ajuda sira tanba sira kolleta liuliu bolu númeru 2 hanesan masa, akua, bimoli fatin, oli fatin, kamera aat no balde sira ne'e mais ou menus kada toneleda $80 ka 8 cen perkilo," katak Jerente Kompañia Caltech.
Nia hatutan, durante ne'e Kompañia Caltech tau sira nia lixu fatin iha Dili laran no mós iha Organizasaun Naun Governamental (NGO) no loja sira, no iha komunidade sira nia leet, maibé iha mós komunidade barak mak lori direita sira nia lixu hansan plastiku sira iha kompañia.
Entretantu, lixu ne'ebé Kompañia Caltech rekolla hodi produs sai produtu konstrusaun nian hanesan papimentu ho triplex, ne’ebé distribui ona ba merkadu nasionál inklui merkadu internasionál hanesan Amerika Canada no Australia, enkuantu amostra ba lixu nian haruka ona ba nasaun Suedia.
