Parabéns J.Luis,“Mata-dalan” Foun ba Oekusse Featured

By Pedro Alves Novembru 07, 2019 4844
Jose Luis Guterres Jose Luis Guterres

DILI: Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak foti ona desizaun hodi hili eis Ministru Negosiu Estranjeiru José Luis Guterres hodi assume kargu nu’udar Prezidente Autoridade Rejiaun Administrativa Espesial Oekusse-Ambeno (RAEOA).

Konsellu Ministru liu husi ninia reuniaun konkorda ho proposta ne’ebé PM Taur hato’o ba nomeiasaun J.Luis sai nu’udar Prezidente RAEOA-ZEESM ba tinan haat oin mai.

“Prezidente interinu (RAEOA-ZEESM) nia mandatu besik remata ona, durante fulan haat ne’e sei termina iha loron 30 fulan Novembru, nune’e Konselu Ministru simu proposta husi Primeiru Ministru hili eis Vise Primeiru Ministru Doutór (José) Luis Guterres mak atu lidera ZEESM-RAEOA,”informa Ministru Prezidensia Konsellu Ministru, Hermenegildo Augusto Pereira Cabral iha palasiu governu, Kuarta (06/11).

Hermenegildo hatete, hafoin KM foti desizaun, sei fó tempu ba Prezidente RAEOA-ZEESM foun hodi harii nia ekipa atu responde ba ezijénsia RAEOA.

Iha fatin ketak, Diretór Peskizadór Ekonomia Universidade Dili, Filipe da Silva la preokupa ho see mak atu lidera RAEOA-ZEESM, importante mak tenke halo mudansa ba ZEEMS.

“Ita troka ema ida mak (nia) la halo buat ida ne’e lakon tempu de’it, tanba pozisaun governu nian laiha ema ida permanente, importante ne’e mak troka ema ruma presiza halo mudansa no progresu ba dezenvolvimentu hodi atinze mehi ba ema hotu nia hakarak,” deklara nia via telephone, horisehik.

Kona-ba kapasidade J.Luis, akademista ne’e hatete, nia laiha duvida kapasidade diplomasia no politika husi figura ne’e, maibé iha parte jestaun iha duvida uitoan.

“Haree ba buat ne’e ema dehan the right man in the right place ne’e laduun tepat, kompara ho eis Prezidente ZEEMS Mari Alkatiri, tanba (Alkatiri) iha kapasidade jestaun atu lidera la'o ba oin,” dehan nia.

 

Rate this item
(0 votes)

Independente Digital TV