MUTL Husu Hikas Prado eis Deputadu Featured

By Pedro Alves Setembru 11, 2019 3931
Asaun MUTL iha tinan kotuk Asaun MUTL iha tinan kotuk

DILI: Hafoin tinan rua ‘hakmatek’, Movimentu Universitariu Timor Leste (MUTL) husu fila fali paradeiru karreta ne’ebé eis deputadu lejislatura datoluk uza no to’o ohin loron seidauk entrega.

Iha 21 Agostu tinan 2017, MUTL halo asaun hasoru Parlamentu Nasionál hodi kontra desizaun leilaun karreta prado ba eis deputadu sira.

Iha asaun ne’e, membru MUTL na’in 13 hetan kapturasaun no detein iha sela Komando Polisia Nasionál Timor Leste (PNTL).

Ho asaun refere, ikus mai Bankada CNRT, FRETILIN, PD no Frente Mudansa konkorda hodi suspende prosesu leilaun karreta prado no karreta refere sei entrega ba deputadu foun ne’ebé sei mai.

Maibé, liu tiha tinan rua prosesu entrega karreta prado husi eis deputadu sira mós paradu.

Ho ida ne’e, MUTL liu husi komunikadu imprensa ne’ebé INDEPENDENTE asesu horisehik, ameasa atu halo manifestasaun hasoru PN.

Portavos MUTL, Fidelio Adelino husu ba deputadu sira, liu-liu bankada CNRT no FRETILIN atu hatudu sira-nia konsistensia no integridade.

“Ami sei halo karta audiénsia hasoru (deputadu) sira, se la responde mak sei hamriik firme ho pozisaun halo demonstrasaun hasoru sira,” dehan Fidelio liu husi komunikadu, Tersa (10/09).

Fidelio husu ba Diresaun Nasional Patrimóniu Estadu atu foti karreta prado 65 hodi ba halo manutensaun no entrega ba deputadu foun sira.

MUTL husu mós ba Komisaun Anti Korrupsaun no orgaun judisiariu sira atu foti prosesu hasoru ema sira ne’ebé privatiza patrimóniu estadu.

“Ida ne’e hanesan krime korrupsaun legal, presiza lori ba investiga tuir prosesu no lei haruka,” deklara portavoz ne’e.

Entretantu, Prezidente Parlamentu Nasionál Arão Noe hatete, PN haruka ona karta ba Ministeriu Públiku (MP) kona-ba karreta prado ne’ebé eis deputadu lejislatura datoluk balun sei uza no muda ona xapa matrikula ba privadu.

“Kona-ba karreta prado, ami haruka tiha ona karta ba ministeriu públiku hodi foti desijaun ba asuntu ne’e.”

“Agora ami sei hein desijaun husi ministeriu públiku ba asuntu ne’e. Destinu karreta prado laos ona iha PN, maibé ami entrega tiha ona ba prosesu judisial atu deside estatutu karreta prado ne’e,” dehan Arão.

Rate this item
(0 votes)

Independente Digital TV