Servisu ne’ebé laiha rezultadu, Deputadu Bankada Kmanek Haburas Unidade Timor-Oan (KHUNTO), Luis Roberto, atu deputadu sira hotu ne’ebé envolve iha ekipa ne’e atu devolve fali osan tanba laiha rezultadu servisu.
“Laiha ona rezultadu servisu, di'ak liu imi 11 ne’e entrega fila-fali povu nia osan”, dehan nia, iha Plenária PN, Tersa (30/4).
Luis esplika, Membru KIP kompostu husi deputadu CNRT, PLP, KHUNTO FRETILIN no PD ne’e kada loron ida hetan perdiem $80 hodi hala’o servisu durante loron 60, nune’e sira husu estende tan loron 30.
Maibé durante fulan tolu remata KIP la konklui rezultadu ruma ba Prezidente Parlamentu Nasionál hodi bele ajenda ba diskusaun plenária.
Problema ne’e mosu tanba partidu bloku Governu no opozisaun ida diferensa opiniaun kona-ba rezultadu finál husi inkéritu ne’e rasik.
Vise-Prezidente PN, Luis Roberto esklarese, orgullu bainhira PN iha inisiativa di'ak hodi kria KIP para atu halo servisu Ministériu Públiku nian kona-ba projetu 143 ne’ebé mosu irregularidade. Maibé labele konvense tanba rezultadu laiha no gasta osan Estadu ho saugate.
“Ha’u konsidera ita boot sira ne’ebé mak sai membru KIP ne’e laiha kapasidade, tanba ita boot sira ne’ebé halo servisu ne’e tau importante liu ba interese partidu ida-idak nian”, tenik nia.
Luis hakarak deputadu sira ne’ebé envolve-aan iha KIP ne’e tenke halo servisu ho solidu para bele hatudu netik rezultadu servisu.
Membru KIP Komete ‘Mal Gastu’
Vise-Prezidente Komisaun G Parlamentu Nasionál Sabino Soares ‘Guntur’, konsidera KIP la konklui ninia servisu tanba ne’e envolve iha sistema mal administrasaun no mal gastu ho osan Estadu nian.
Servisu ne’e la hatudu rezultadu tanba relatóriu ne’ebé Prezidente no Vise-Prezidente KIP aprezenta ba Prezidente PN la hetan aprovasaun husi membru sira.
“Ami sente triste tanba KIP uza tiha ona Estadu nian maibé rezultadu nulu” tenik nia.
Deputadu Bankada PLP ne’e konsidera osan Estadu ne’ebé gastu saugati tenke buka tuir atu hatene. Tan ne’e, husu ba Ministériu Públiku (MP) no Komisaun Anti Korrupsaun (KAK) atu buka tuir kauza sira ne’e.
Tuir nia, osan lubuk ida maka gastu ona loloos tenke konklui rezultadu ruma, maibé kuandu laiha KIP tenke toma responsabilidade.
