Segunda, 14 Outubru 2019 | Login
Deputadu Bankada Partidu Congresso Nacional Reconstrução Timor-Leste (CNRT), Francisco Kalbuadi Lay Deputadu Bankada Partidu Congresso Nacional Reconstrução Timor-Leste (CNRT), Francisco Kalbuadi Lay

Kalbuadi Ba Estranjeiru, PN Laiha Koñesimentu Featured

DILI: Deputadu Bankada Partidu Congresso Nacional Reconstrução Timor-Leste (CNRT), Francisco Kalbuadi Lay, ba fali estranjeiru ‘maski’ foin halo servisu semana ida de'it, iha Parlamentu Nasionál.

Maski nune’e, dezlokasaun Sekretáriu Jerál Partidu CNRT ne’e laiha informasaun ba meza Parlamentu Nasionál.

Vise-Prezidente Parlamentu Nasionál, Luis Roberto hateten, deputadu sira ne’ebé tama sai iha Parlamentu ne’e sira-nia direitu, maibé karik sai ba iha estranjeiru ho motivu saida de’it presiza fó informasaun ba meza atu hatene.

“Ha’u rasik la hatene Francisco Kalbuadi ba estranjeiru ba halo saida? Deputadu sira karik iha problema saúde ka buat seluk presiza informa atu nune’e ita bele hatene”, dehan nia, iha Uma Fukun PN, horisehik.

Nia esplika, deputadu hotu-hotu ne’ebé labele halo knaar ba hetan impedimentu ruma sira iha devér no obrigasaun atu fó informasaun ba meza PN.

Iha fatin hanesan, Vise-Prezidente Bankada FRETILIN, Josefa Pereira hateten, hanesan deputadu efetivu iha PN, bainhira iha nesesidade atu sai, iha forma rua atu justifika, primeiru antes sai justifika kedas razaun nia sai no bele ba fila mak halo justifikasaun falta.

“Ha’u nia haree nia (Francisco Kalbuadi) tama tiha depois sai fali ne’e polítika uitoan”, dehan nia.

Antes ne’e hetan notifikasaun husi Tribunál, depois mai retoma pozisaun maibé loron hira de’it fila fali ba estranjeiru, ne’e hatudu katak hakarak sees aan husi justisa.

Bainhira sente katak la sala, koopera ho justisa hodi ba hataan iha Tribunál hafoin bele deside sala ka loos, maibé hanesan ne’e de’it tama sai hodi goza imunidade.

Situasaun ne’e la’o hanesan ne’e hela de’it povu ki'ik sira sente justisa ne’e ba de’it ema lian laek sira maibé ba ema boot sira lae.

Entretantu, Prezidente Bankada CNRT, Duarte Nunes hateten, Deputadu Francisco Kalbuadi Lay hanesan Prezidente Rejionál FIFA, tanba ne’e ba tuir enkontru nivel altu nian iha estranjeiru.

“Hanesan deputadu ba fila mak justifika nia falta ne’e normál, ne’e inkestionavel”, tenik nia.

Duarte hateten, deputadu ne’e ba tuir enkontru FIFA nian durante loron tolu no sei fila hikas iha Tersa (5/3) no kontinua tama servisu iha Kuarta (6/3).

Nia esplika, dezlokasaun ne’e infoma de’it ba iha Bankada no Partidu CNRT, maibé ba meza sei halo justifikasaun depois fila mai.

Sekretáriu Jerál Partidu Congresso Nacional Reconstrução Timor-Leste (CNRT), Francisco Kalbuadi Lay, ba fali ona estranjeiru, ho aviaun Citilink, iha Sábadu (2/3).

 

Read 943 times Last modified on Domingu, 10 Marsu 2019 18:17
Rate this item
(0 votes)