Tuir informasaun husi sasin balun iha Vemasse, kazu asalta-malu ne’ebé akontese iha area Kaikua, Vemasse, ne’e mosu hafoin membru grupu PSHT ho IKS baku-malu iha bazar iha Sabadu dader.

Hafoin ida ne’e, iha Sabadu loraik, grupu sira ne’e hahú halo sweeping iha estrada klaran iha ida-idak nia area. Grupu husi IKS halo sweeping besik ponte-boot Vemasse, Sukaer Laran, no grupu PSHT halo sweeping iha Vemasse Villa, besik Eskola Baziku Filial 3 Ciclo Vemasse.

Komunidade balun ne’ebé konsege tama iha sweeping husi grupu sira ne’e fó sasin katak, ema lubuk ida hamriik iha estrada klaran ho katana, rama, no sasan kroat sira seluk hodi halo revista ba kada viaturas ne’ebé liu ba-mai.

“Balun taka oin hanesan ninja. Sira kaer katana, rama ambon. Balun fali kaer fatuk no ai. Bainhira ha’u to’o sira haruka ha’u para, maibé balun haruka liu ba de’it,” dehan komunidade ida ne’ebé hala’o viajen husi Dili ba Baukau iha Sabadu loraik.

Maibé asaun ne’e la kleur tanba iha tuku 4 ho balun loraik, ekipa Polisia Nasionál Timor Leste (PNTL) Vemasse konsege duni grupu sira. Grupu hirak ne’e halai fahe-malu hafoin polisia tiru ba leten.

Maske halai fila ona, maibé grupu sira ne’e kontinua halo planu hodi asalta-malu. Maizumenus iha tuku 6 loraik, bainhira komunidade balun atu ba rate hodi kari aifunan kore-metan nian, grupu balun hahú asalta.

Husi akontesimentu ne’e, tuir dadus provizoriu husi sentru saúde Vemasse, ema na’in neen (6) mak hetan kanek no lori ba sentru saúde hodi hetan tratamentu. Na’in rua mak hetan kanek todan, ida hetan ta’a iha kanotak no kabun. Ida seluk hetan ta’a iha ulun no ain.

“Na’in neen (6) mak mai iha ne’e (sentru saúde). Na’in ida ami rujuk ba (ospital) Baukau. Ami rona dehan mate ona. Nia hetan ta’a iha ulun no ain,” informa mediku ida ne’ebé lakohi públika nia identidade.

Tuir mediku ne’e, husi ema na’in 6 ne’ebé kanek, iha feto na’in rua no labarik na’in ida, feto ida hetan kanek iha ain, ida iha ulun no labarik hetan pankada iha kabun.

“Na’in neen ne’e mak ami hatene tanba lori mai iha sentru. Karik seluk sei iha tanba balun nia familia mai husu de’it aimoruk lori ba uma,” dehan nia.

Tuir informasaun, PNTL hahú halo operasaun iha area Vemasse atu bele evita konflitu foun mosu tan. To’o notisia ne’e hatuun, jornál INDEPENDENTE seidauk konsege hetan informasaun husi autoridade seguransa.