Kinta, 01 Outubru 2020 | Login
Ospital Nasional Guido Valadares Ospital Nasional Guido Valadares

Ahi Mate-Lakan iha HNGV, Vida Pasiente Ameasadu Featured

DILI: Profesional saúde sira iha Hospital Nasionál Guido Valadares (HNGV) hasoru hela problema ho ahi ne'ebé mate-lakan. Problema ne'e bele fó ameasa ba pasiente sira-nia vida.

Tuir informasaun husi fonte ne'ebé lakohi públika ninia identidade katak, iha Kinta (12/03) loraik tuku neen ho balun ahi iha ospital nasionál mate, hafoin menutu lima tuir mai ahi lakan hikas, maibé la kleur mate fila fali.

Iha loron ida ne'e, tuir fonte ne'e, ahi iha HNGV mate no lakan maizumenus dala haat ona.

"Ahi mate depois la kleur lakan fali, depois menutu 30 hanesan mate fali, mate lakan hanesan ne'e to'o dala haat ona," dehan fonte ne'e via telefone, Kinta (12/03).

Tuir fonte ne'e, profesional saúde sira kestiona tanba bainhira ahi mate kleur liu bele fó ameasa ba pasiente sira-nia vida.

Nia dehan, mosu situasaun ida ne'ebé halo profesional saúde sira preokupa tebes. Bainhira sira tenta hasai foer husi bebé ida ne'ebé foin moris, derrepente ahi mate no sira tenke bomba bebé refere iha nakukun laran.

"Profesional saúde sira tenta uza suction hodi supa sai foer iha bebé nia kakorok, maibé ahi mate ne'ebé mediku sira la konsege supa," dehan nia.

Aleinde ne'e, iha Unidade Neonatolojia iha bebé na'in lima mak uza hela makina dada iis nian. Bainhira ahi mate tenke uza batria ne'ebé karega maibé batria ne'e la tahan kleur.

"Batria makina ne'e bele tahan maizumenus menutu 15 to'o menutu 30, depende mós ba makina ne'e, tanba balun kondisaun ladun di'ak ona," dehan fonte ne'e.

Read 2392 times
Rate this item
(0 votes)