Xanana Kontesta Desizaun Tribunál Ba Gastão Featured

By INDEPENDENTE Novembru 08, 2018 7794
Prezidente Partidu Congresso Nacional Reconstruçao Timor-Leste (CNRT), Kay Rala Xanana Gusmão Prezidente Partidu Congresso Nacional Reconstruçao Timor-Leste (CNRT), Kay Rala Xanana Gusmão

DILI: Prezidente Partidu Congresso Nacional Reconstruçao Timor-Leste (CNRT), Kay Rala Xanana Gusmão, ‘soe-piada’ relasiona ho desizaun Tribunál Munisipál Dili (TMD) ne’ebé kondena Gastão Sousa, Eis-Ministru Obras Publika.

Tuir Xanana, povu iha Timor maioria Katólika ne’e husu ba juis no prokuradór sira iha Tribunál, tanba antes komemorasaun sentenáriu selebrasaun Santu António iha Manatutu Estadu ka governu fó empresta karreta ba Pároku Manatutu atu uza hodi halo preparasaun ba festa ne’e.

Momentu ne'ebá karreta entrega hikas ho kondisaun ne’ebé di'ak, maibé kondena ema hirak ne’ebé entrega no uza karreta ne’e hotu.

“Estadu, governu asina fó empresta karreta ba pároku Manatutu atu halo preparasaun, festa hotu tiha entrega hikas karreta ho kondisaun ne’ebé di'ak maibé ita kondena fali ema hirak ne’e. Ita Katóliku! Ha’u la fiar”, tenik nia, iha Uma Fukun PN, horisehik.

Antes ne’e, TMD liu husi leitura akordaun kondena arguidu Gastão Sousa, eis-Ministru Obras Publika (MOP) no Diogo da Costa, Eis-Xefe Gabinete ho pena suspensaun.

Nune’e arguidu sira seluk hanesan arguidu Martinho Gusmão, Ferlio Sousa ho Jordão Sousa ne'ebé hanesan arguidu Gastão nia oan, hetan absolve.

Tribunál kondena arguidu na’in rua Gastão ho pena prizaun tinan rua fulan neen no suspende ba tinan rua fulan neen no arguidu Diogo tinan ida fulan neen no suspende ba prizaun tinan ida fulan neen.

Nune’e, Tribunál mós aplika indenizasaun ba arguidu Gastão no arguidu Diogo.

Tribunál kondena arguidu na'in rua tanba konsidera katak, sira hatene karreta ne’e pertense ba Estadu nian maibé autoriza ba ema seluk uza ba nesesidade privadu. Nune’e konsidera prienxe ba rekizitu krime pekulatu no pekulatu-de-uzu tuir Kódigu Penál Timor Leste.

Tribunál mós absolve arguidu Gastão husi Krime Administrasaun Danoza no absolve arguidu Diogo husi krime Falsifikasaun Dokumentu, tanba la komprova.

Rate this item
(0 votes)

Independente Digital TV