Prende Motór, Membru PNTL no F-FDTL Baku Malu Featured

By Tomé Amado Dezembru 14, 2018 6467
Ilustrasaun baku malu Ilustrasaun baku malu

DILI: Komandu Polisia Nasionál Timor-Leste, Eskuadra Bekora, Kuarta(12/12) kalan maizumenus tuku 10:30 hetan vizita husi pesoál membru FALINTIL-Forsa Defeza Timor-Leste (F-FDTL) na’in tolu husi Komponente Navál ho kondisaun lanu, no hakilar polisia to’o baku malu.

 

Asaun ne’e mosu tanba pesoál membru F-FDTL Komponente Navál ne’e la simu sira ninia motór polisia eskuadra Bekora prende.

Polisia tránzitu hamutuk ho forsa rezerva eskuadra Kristu Rei hala'o operasaun check point ba transporte karreta no motorizada, inklui sasán kro'at iha área Bekora.

Operasaun ne’e konsege prende motorizada ne'ebé motorista rasik la uza kapasete ho lanu todan tama iha área check point. Tuir regra ema hotu tenke kumpre lei kódigu estrada.

Membru Polisia Nasionál Servisu Investigasaun Kriminál (PNSIK)_ne’ebé lakohi temi naran hateten, asaun ne’ebé pesoál F-FDTL na'in tolu halo iha eskuadra Bekora ne’e konsidera provokasaun.

Nia hateten, pesoál forsa sira ne’e hatene didi'ak Polisia hala'o hela check point iha área Bekora, ne'ebé la dook husi fatin ne'ebé sira hemu. Tanbasá mak sira haruka tan ema sivíl ida sa'e motór tama ba área check point la uza kapasete.

Ami hanesan Polisia ne’e ami nia servisu no ami konsidera infrasaun, entaun tenke hapara. Bainhira ami lori ona motór sira ne’e mai iha eskuadra mak sira na’in tolu tuir mai obriga atu foti fali motór”, tenik nia, iha Dili, horisehik.

Maibé ne’e regra, sé de’it mak kontra lei kona-ba kódigu estrada konsidera infrasaun. Ne’e duni tenke kumpre regra hodi kompleta prosesu administrasaun hodi ba selu iha banku.

Ho esplikasaun ne’e, pesoál forsa na’in tolu ne’e la simu no hakilar malu ho polisia, ikus mai baku malu.

Kazu ne’e rasik Komandante Eskuadra informa kedas ba Unidade Polisia Militár (UPM) no kalan ne’e kedas hatún kedas ekipa ida hodi mai foti pesoál na’in tolu ne’e.

Entretantu, kazu ne’e rasik jornalista diáriu ne’e tenta halo konfirmasaun ho Segundu Komandante Polisia Munisípiu Dili, maibé nia rasik lakohi fó komentáriu.

Rate this item
(0 votes)

Independente Digital TV