×

Atenção

JUser: :_load: Não foi possível carregar usuário com ID: 430

Operasaun PNTL Prende Tudik Modo no Kilat Manu Featured

By Jullu 03, 2017 1766
Operasaun PNTL iha kapital Dili Operasaun PNTL iha kapital Dili

DILI: Operasaun Polisia Nasionál Timor-Leste (PNTL) ba sasán kro'at iha Dili laran konsege prende kilat manu tolu no tudik modo lubuk ne’ebé komunidade lori tuituir bainhira halo viajen ba li'ur.

Segundu Komandante PNTL Munisípiu Dili, Superintendente Asistente Euclides Belo hatete, operasaun sasán kro'at ne’ebé polisia halo ba komunidade sira durante fulan Juñu konsege prende tudik modo lubuk ida, inklui kilat manu tolu.

Nia dehan, operasaun ne’e durante polisia halo ba motorista sira ne’ebé foka liu ba lei arma branka nian.

“Durante ne’e ita mós hetan sasán kro'at ne’ebé motorista sira lori bainhira ita halo operasaun ba transporte sira”, dehan nia, iha Komandu PNTL Munisípiu Dili, Kaikoli, Sesta (30/6).

Ne’e duni, nia apela ba sidadaun timoroan hotu katak, lei arma branka promulga ona, tan ne’e labele lori sasán kro'at iha fatin públiku.

Alende ne’e, Euclides dehan, iha operasaun ne’e rasik polisia konsege prende kilat manu tolu iha fulan Juñu nia laran, bainhira halo cheek point ba transporte públiku ho privadu sira.

Nia dehan, sidadaun ne’ebé lori sasán kro'at bainhira prosesu investigasaun remata aprezenta ba tribunál, desizaun ne’ebé tribunál hatún ba suspeitu sira ne’e halo aprezentasaun periódika.

Nia afirma, sasán kro'at daudaun ne’e polisia asegura hela iha seksaun investigasaun kriminál, tanba prosesu investigasaun seidauk remata.

Operasaun ba Motorizada 751 Kanu Racing 12

Superintendente Asistente Euclides Belo afirma, iha operasaun ne’ebé Komandu PNTL Munisípiu Dili halo ba transporte públiku ho privadu. Konsege prende motorizada hamutuk 751.

Nune’e, iha operasaun ne’e mós konsege prende motór kanu racing 12 durante ne’e halo sirkulasaun iha Dili laran halo estrundu iha sidade laran.

“Kanu racing sira ne’e ita prende, balun ita halo operasaun no komunidade sira maka lansa informasaun ba ami”, tenik nia.

Nia dehan, transporte sira ne’e servisu rodoviaria foti infrasaun ba sira, tanba viatura hirak ne’e balun asesoria motór ho karreta nian no dokumentu la kompletu.

Alende ne’e, nia Informa, iha operasaun rasik mós polisia konsege detein ema na’in lima laiha karta kondusaun.

Tuir nia, ema na’in lima ne’e polisia aprezenta ona ba Ministériu Públiku hodi hataan ona tribunál, foin lalais ne’e. 

Rate this item
(0 votes)

Independente Digital TV