Tersa, 18 Dezembru 2018 | Login
Ilustrasaun feto kaer toman nia doben la’o ho feto seluk. FOTO: bintang.com Ilustrasaun feto kaer toman nia doben la’o ho feto seluk. FOTO: bintang.com

Ho Feto iha Karreta Laran, Feen ‘Rakut’ Laen Featured

DILI: See mak la laran moras haree ema ne’ebé sira jura atu moris hamutuk to’o mate hamutuk hela ho ema seluk? Ida ne’e mak akontese ba feto ida ho inisial SPG ne’ebé la konsege tahan nia emosaun no halo agresaun fiziku hasoru nia laen.

Maske feto ne’e karik iha razaun ne’ebé loos, maibé nia asaun la’os asaun di’ak ne’ebé bele sai ezemplu. Tanba problema atu boot oinsa mós importante tebes kontrola an no emosaun hodi rezolve ho ulun malirin.

Tanba bainhira halo asaun ne’ebé tama ba kategoria krime, klaru tenke prontu atu hatan iha dalan justisa nian.

Tuir deklarasaun husi arguida SPG, durante tinan rua nia laran, nia laen ho inisial F husik hela nia ho nia oan na’in rua.

Tan ne’e, SPG hatutan, nia hakarak koalia didi’ak ho lezadu F atu sira bele hadi’a fali sira-nia uma-kain.

Maibé, hanoin ne’e hahú muda uitoan no emosaun book fuan bainhira arguida hetan lezadu nia fotografia ho feto ida ho inisial Z.

Iha tempu ida, arguida la finze haree lezadu iha hela loza Gloria Jeans, Audian. Arguida deside hodi tuir lezadu husi kotuk sein lezadu hatene atu bele haree no hatene see mak tuur hela ho lezadu iha karreta laran.

Lezadu ne’ebé kondus karreta hahú halai ba area Eskola Paulo no arguida nia raan nakali bainhira haree katak feto ida, Z, tuur hela iha nia laen nia sorin.

Bainhira karreta ne’ebé F kondus para, arguida hakat ba no hahú halo agresaun fiziku ba nia laen F.

Ho emosaun arguida rakut nia laen nia liman no isin ne’ebé rezulta mane ne’e hetan kanek iha nia isin lolon no liman.

Ho faktu hirak ne’e, Ministériu Públiku liu husi audensia julgamentu iha Tribunal Munisipiu Dili, Kuarta (05/12), akuza arguida nu’udar autora ba krime violensia doméstika ho forma ofensa integridade fiziku simples.

Iha nia alegasaun, Ministériu Públiku husu ba tribunál atu fó suspensaun minimu tuir artigu 145.

Defeza husi arguida hatete nia kliente halo agregasaun fiziku ba nia eis laen tanba arguida nu’udar feto ida ne’ebé nia laen abandona durante tinan 2 no nia mesak tau-matan ba nia oan nain rua.

Tan ne’e, defeza husu ba tribunál atu fó pena ne’ebé kamaan.

Rona deklarasaun husi parte rua, tribunál adia julgamentu ba 17 Dezembru 2018, tuku 5 lorokraik hodi rona leitura sentensa.

Audensia julgamentu ne’e prezide husi juiz singular Ivan Suritai, MP reprezenta husi Bartolomeu de Araujo no arguida hetan asistensia husi Defensor Públiku Jonas Henrique.

Read 451 times
Rate this item
(1 Vote)