PNTL hetan ona informasaun katak iha loron 10 setembro 2018, timoroan lubuk ida sei tama ba Kupang no Atambua liu husi fronteira rua para atu ba sa’e sabuk.

Komandante daruak PNTL Municipiu Dili, Superintendente asistente Polisia Euclidis Belo hateten ninia parte hetan ona informasaun. Tanba ne’e sira halo ona kontaktu ho Polisia iha fronteira atu hasa’e liu tan movimentu kontrolu.

“Ami rona sira sei liu husi fronteira terestre. No barak sei tama liu husi Oekusse. Ami husu ona ba Unidade Polisia Fronteira (UPF) Oekusse par atu servisu di’ak liu tan hametin seguransa iha fronteira,” dehan Euclides iha edifisiu Komando Polisia Kaikoli, foin lalais.

Euclidies dehan Timor-oan ne’ebe mak atu ba sa’e sabuk iha Indoneisia ne’e sei tama ida-idak sira sei la grupu. To’o ona iha Atmbua mak sira foin hasoru malu.

Informasaun sira ne’e Polisia rekolha hotu ona. No agora hein de’it para atu ejekuta. Tuir nia katak durante ne’e polisia halo hela vizilansia iha kapital para atu rekolha informasaun relasiona ho sira nia treinamentu.

Maibe grupu artemarsiais sira ne’e hala’o treinamentu fahe malu. laos halibur iha fatin ida de’it. Euclidis hatutan informasaun ne’ebe mak tama iha ninia liman hateten sira halo prifat mak barak liu tanba ne’e difisil atu kontrola. Maibe polisia sei kontrola sira iha linha fronteira. Tamba lei numeru 5/2017 fo kompotensia bo’ot ba Polisia atu hala’o servisu sira ne’e.