Sábadu, 23 Setembru 2017 | Login
Aviaun Citilink iha Dili Aviaun Citilink iha Dili

Citilink Seidauk Rejistu iha SERVE Featured

DILI: Aviaun Citilink ne’ebé hahú ona operasaun iha Sesta (12/5), ho rute Dili-Denpasar seidauk tuir proseduramentu legal. Kompañia ne’e seidauk hetan sertifikadu komersiál husi Servisu Rejistu Verifikasaun Emprezariál (SERVE).

Diretór Jerál SERVE Florêncio Sanches hatete, aviaun Citilink ne'ebé halo ona operasaun ona maibé seidauk hetan sertifikadu komérsiu nian. Tanba tuir lei, hotu-hotu tenke kumpre regulamentu.

“CITILINK kompañia boot iha Indonézia, entaun nia labele mai halo operasaun ho ilegál”, dehan nia, iha salaun Ministériu Solidariedade Sosiál (MSS), horisehik.

Husi parte SERVE nian fó prazu tempu loron lima, maibé ministru husu atu aumenta ba loron sanulu (10). Ne’e duni, iha loron ne’ebé determina mak labele kumpre SERVE sei labele prosesa ba oin.

Maski temi Ministru, Diretór ne’e la esplika detaillu kona ba ministru ne’ebé mak husu atu aumenta loron.

Nia dehan, tuir lei tenke mai rejistu mak foin halo operasaun, maibé realidade halo ona operasaun loron tolu, depois SERVE rasik ba halo enkontru ho parte ministeriu relevante no bolu sira.

Diretór esplika, lala'ok hanesan ne’e loloos labele, tanba seidauk ba aprezenta hodi hetan sertifikadu, maibé halo uluk ona negósiu.

Tuir loloos ne’e laiha toleránsia ba aktu ilegál hanesan ne’e, maibé SERVE fó tan tempu loron sanulu. Kuandu la kumpre sei haruka hapara negósiu obrigatoriamente.

“Atu ko'alia loos de'it katak, Citilink seidauk iha entidade loloos iha Timor-Leste no nia kontra ona lei sira hanesan lei sosiál komersiál 7/2007, lei 8/2008, lei tributária atu selu taxa nian, tuir fali mai dekretu lei 35/2012, liuliu artigu 26-27 ne'ebé ko'alia kona-ba nia língua, ikus lei seidauk hetan lisensa”, tenik Florêncio.

Antes ne’e, halo ona operasaun iha Setembru 2015 to’o Janeiru 2017 ho rute Denpasar-Dili nu’udar aviasaun charter liu husi kooperasaun ho kompañia Air Timor.

Nune’e, antes lansa aviasaun Citilink, Diretór Jeral Citilink, Juliandra Nurtjahjo hatete, aviaun ne’e sei halo operasaun husi Jakarta ba Dili liu husi Denpasar.

Tinan 2017 aleinde hala'o espansaun rute doméstika ba Indonézia Leste, tinan ne’e Citilink loke mós operasaun ba rejionál. Dili sai destinasaun operasaun rejionál dahuluk husi Citilink nian”, dehan Juliandra.

Atu sustenta rute operasaun ne’e Citilink sei uza aviaun modelu Airbus A320 ne’ebé ho idade menus husi tinan haat no bele akumula kapasidade pasajeiru 160. 

Read 342 times
Rate this item
(0 votes)

About Author

  • MidAd1
  • Heineken Klaran
AdBottom1