Assanami dehan, bainhira hetan fiar husi povu atu kaer ukun no bandu, nia sei promove politika jeral ida oinsa atu garantia edukasaun no saúde ho kualidade.

Seitór saúde no edukasaun, tuir kandidatu númeru 16 ne’e, tenke promove ho di’ak nune’e bele forma jerasaun ida ne’ebé iha kualidade.

Nia hatutan, bainhira saude no edukasaun di’ak sei forma joven ho dimensaun espiritual, fiziku, intelektual no mental ne’ebé bele forma foinsa’e sira sai kompetetivu iha rejiaun.

“Ita agora iha mundu teknolojia, ema nasaun seluk agora avansadu tebes ona, ita presiza adapta aan tuir mudansa mundu nian, ita laiha ona tempu par bele konta ita-nia terus, ita-nia susar, se nune’e hela de’it ita sei nafatin iha kotuk,” dehan nia, iha kampu futebol Vikeke, Kuarta (09/03).

Durante ne’e, tuir Assanami, dezenvolvimentu setór rua ne’e la’o, maibé seidauk masimu tanba haree katak ema moras baibain ba ospital laiha antedimentu ne’ebé di’ak ikus mai ema lakon vida.

Postu saúde sira ne’ebé governu hari iha área remotas, barak laiha fasilidade, laiha mediku espesialista, aimoruk kuran.

Buat hirak ne’e, tuir nia, presiza atu fó solusaun.

Prezidente Repúblika, nia dehan, presiza promove politika jeral ida nune’e orienta governu halo planu orsamentu ne’ebé adekuadu hodi sosa ekipamentu saude no edukasaun nian, promove no hasa’e koñesementu ajenta sira ne’ebé hala’o funsaun.

Alende ekipamentu, presiza haree mós sira-nia salariu mensal atu nune’e sira bele moris dignu hodi hala’o funsaun nu’udar ema profissional ne’ebé bele kura ema no eduka labarik sira sai ema ne’ebé útil.