Assanami hatete, lider jerasaun tuan nia luta mak ohin loron nasaun ne’e hetan ninia independensia hodi fó biban ba ema hotu-hotu goza nia vida nu’udar sidadaun.

“Ha’u konsidera aman sira ne’e sai hanesan livru moris nian, ha’u laiha moral atu ko’alia aat sira, trata sira liu husi media sosial,” dehan nia liu husi kampaña eleitoral, iha kampu futebol Vikeke, Kuarta (09/03).

Assanami hatete, joven mak futuru nasaun, tanba ne’e aprende husi aman sira, labele haree ba sira-nia konflitu hodi hatun ida no hasa’e ida seluk.

Joven, nia hatutan, tenke hola responsabilidade oinsá atu projeta futuru ba dezenvolvimentu nasionál no labele esplora katuas sira-nia istoria hodi hetan previlejiu.

Hanesan joven tenke respeita aman sira karik sira komete sala ruma durante ne’e labele uza momentum hanesan ne’e hodi hatun sira, maibé foti sai hanesan lisaun ida bainhira ukun karik bele halo di’ak liu tán.

Tuir Assanami, iha mundu tenknolojia ohin loron, foinsa’e sira tenke utiliza meius komunikasaun sira hodi estuda, akompaña mudansa sira iha mundu no labele utiliza fali meius sira ne’e ba buat ne’ebé laiha benefisiu ba aan rasik.