Horta hatete, nia halo ona kontaktu ho nasaun sira seluk hodi bele simu tan joven Timor-oan sira ba servisu iha ne’ebá atu hadia sira-nia moris.

“Ha’u hahú ko’alia ho governu Japaun no Alemaña atu simu ita-nia joven sira tenke ba servisu iha ne’ebá, lalika moe, ita-boot sira servisu iha ne’eba servisu simu osan di’ak bele hadia imi-nia vida no familia, nune’e mós iha Koreia do Súl no Portugál fasilita ita-nia Timoroan barak ba servisu iha Inglatera. Ita labele moe, uluk Portugál nia sidadaun mós ba servisu iha rai li’ur mak dezenvolve fali sira-nia rai,” dehan Horta bainhira hala’o dialogu komuinitária ho komunidade Aldeia Kulau, Suku Bekora, Postu Administrativu Kristu Rei, Munisipiu Dili, Kinta (24/02).

Horta apela ba joven sira tenke mantein kalma no paz hodi evita konflitu akontese iha sira-nia bairu, nune’e fó tempu ba governu rezolve problema nasaun no buka koordena ho nasaun parseiru sira simu joven sira.

Horta dehan, nia sente orgullu tebes, tanba durante ne’e Timor-oan barak servisu iha rai li’ur hodi kontribui selu taxa ba estadu Timor-Leste.

Aleinde kampu servisu, Horta dehan, nia sei koordena ho Governu Timor-Leste oinsá mak hadia kapitál Dili.

Nia dehan, tenke organiza didi’ak sidade Dili atu regula uma labele halo arbiru, maibé tenke iha distansiamentu hodi evita harii uma rabat malu.

Iha fatin hanesan, Reprezentante Juventude Feto Kulau, Luciana Pereira dehan, juventude prontu apoiu Horta no Xanana, importante liu mak kria kampu servisu.

“Ami juventude Kamea presiza liu mak kria kampu servisu, tanba durante tinan barak joven sei moris dezempregu, tanba laiha kampu servisu,” nia hatete.

Parte seluk, Xefe Aldeia Kulau Laletek, Manuel Pereira dehan povu presiza liu mak kandidatu prezidente ne’ebé hatene rezolve povu nia preokupasaun no ajuda povu bainhira hasoru situasaun defisil.

“Ami Suku Kulau Laletek matan haree no akompaña Avo Ramos no Avó Nana ne’ebé sempre hamutuk ho ami no terus hamutuk ho ami, no ami prontu vota Avo Ramos hodi hadia ita hotu nia vida moris,” nia hatete.

Konsolidasaun CNRT

Entretantu, Ramos Horta partisipa mós programa kosolidasaun partidu CNRT hodi apoia ninia kandidatura ba PR ne’ebé realiza iha Aildeia Bidau Toko Baru, Suku Kuluhun.

Iha konsolidasaun ne’e, Reprezentante Juventude Toko Baru, João Bastista de Araújo deklara, Xanana no Horta merese duni ukun, tanba sira nu’udar lider ezemplar no estadista ne’ebé sempre hamutuk ho povu bainhira hasoru susar no terus. 

“Ami so temi dehan iha Timor ne’e ita-boot na’in rua hanesan estadista merese duni ba ita-boot na’in rua atu hamutuk, tanba sein Romos Horta, sein diplomata no sein Xanana, sein dezenvolvimentu.  Tanba imi rua hanesan ilas na’in Jesus Kristu no sura mós ho ami hanesan imi nia eskolante ne’ebé sei hamoris povu ida ne’e nia moris, atu moris di’ak liu tán,” nia hatete.

Xefe Suku Kuluhun, Deosdato Martins agradese ba Ramos Horta bele esplika ninia preparasaun ba povu hodi bele deside kandidatu ida ne’ebé di’ak atu ukun nasaun ne’e.

“Xefe suku Kuluhun ho familia no ita hotu sei hamutuk vota ba Maun José Ramos Horta hodi tuur iha Aitarak-Laran no sai prezidente ida kualidade no sai prezidente ba povu tomak,” nia hatete. 

Entretantu Ekipa Susesu Kandidatu Prezidente Repúblika, José Ramos Horta Postu Kristu Rei Jacinto “Kulau”, garante Horta sei manan iha Postu Kristu Rei.