Kandidatu Prezidente Republika Mariano Assanami Sabino hateten, Prezidente Repúblika mak sai hanesan komandate supremu forsa armada nian, tanba ne’e tenke dezenvolve militar professional tanba ohin loron ne’e era teknolojia.
Iha rai bar-barak ohin loron dezenvolve ninia militar sai professional evolui tuir teknolojia modernu ne’ebé ema hotu ohin loron iha, iha rai sira seluk ohin loron kontrola ninia soberania ho ekipamentu ne’ebé mordernu.
“Ita haree rai bar-barak kuandu funu sira uza ona teknolojia, ita Timor hakarak moderniza militar la’os atu halo funu, maibé moderniza ita nia forsa atu domina teknolojia hodi kotrola ita nia tasi ne’ebé luan,” dehan nia, liu husi diskursu politiku iha kampaña da-toluk, iha Same Villa, Sesta (04/03).
Assanami dehan, Tasi Timor ne’e luan dala tolu liu rai maran, tanba ne’e presiza kontrola hodi evita ema kontinua peska illegal iha Tasi Timor hodi naok ikan no riku soin sira seluk.
Entertantu Xefe Estadu mós tenke garantia instituisaun ne’e tenke sai lutu ba nasaun labele amiasa fila fali ba povu.
Prezidente Repúblika ne’e atu haree ba politika estadu nian, tanba ne’e bainhira Assanami eleitu ba PR sei ko’alia ho governu liu-liu Ministeriu Defeza atu nune’e bele hasa’e forsa sira nia salariu, haree sira hahan, atu nune’e sira bele iha fijiku ne’ebé di’ak.
Alende ne’e presiza moderniza ekipamentu hotu militar nia sira bele utiliza hala’o servisu hodi sai lutu nasaun ho sasan ne’ebé favoravel.
