Kuarta, 20 Outubru 2021 | Login
Embaxador Xina ba Timor-Leste hasoru malu ho Primeiru Ministru Taur Matan Ruak, kinta ohin (22/4), iha sala Gabinete PM. Foto Embaxada Xina. Embaxador Xina ba Timor-Leste hasoru malu ho Primeiru Ministru Taur Matan Ruak, kinta ohin (22/4), iha sala Gabinete PM. Foto Embaxada Xina.

Xina Apoia Vasina Sinovac Covid-19 Doze Rihun 100 ba TL Featured

DILI: Governu Xina anunsia prontu apoia vasina Sinocav Covid-19 ba Timor-Leste tuir pedidu Governu ne’ebé lidera husi Primeiru Ministru Taur Matan Ruak.

Relasionadu apoiu ne’e, iha loron 22 fulan-Abril, Embaixadór Xiao Jianguo hasoru malu ho Primeiru Ministru,Taur Matan Ruak, aprezenta progresu ikus iha kooperasaun vasina entre nasaun rua ne'e.

Embaixadór anunsia katak pedidu husi parte Timor-oan nian no bazea ba relasaun tradisional no fraterna entre nasaun rua ne'e, Governu Xina konkorda atu fó vasina Sinovac Covid-19 rihun 100 ba Governu Timor-Leste sei to’o Timor-Leste iha tempu besik.

Prioridade vasinasaun mós espera bele aranja ba sidadaun no komunidade Xineza sira iha Timor-Leste.

Embaixadór subliña, Prezidente Xinés Xi Jinping dala ida hateten katak Xina sei respeitu nia komitmentu atu halo vasina hanesan bem públiku global. Xina fiar metin iha halo vasina sai hanesan bem públiku global no Xina mós servisu ho laran atu hasae asebilidade no proporsiona vasina iha nasaun dezenvolvimentu,inklui Timor-Leste.

Embaixador hatutan, anunsia ohin nian marka importansia progresu ida iha kooperasaun bilateral no espera donasaun ida ne'e bele haforsa abilidade Timor-oan nian iha kombate Covid-19 no fasilita rekuperasaun lalais iha ekonómia no ho inundasaun.

Primeiru Ministru agradese ba Xina nia apoiu konsistente no firme, laos deit ba prosesu luta atual Covid-19, maibé mós iha prosesu naruk husi luta ba independensia no dezenvolvimentu nasional.

Medida relevante hirak ne'e sei garante katak, Vasina Xinés sei to'o iha Timor-Leste iha tempu badak. Governu Timor-Leste sei oferese asistensia nesesariu atu vasina ema estranjeiru inklui sidadaun Xineza sira.

Entretantu molok ne’e, Timor-Leste mós hetan ona apoiu vasina Astrazeneca ba faze dahuluk doze rihun 24, fundus husi Nasaun Unida ba Infánsia (UNICEF) liuhusi COVAX.

Faze daruak, Governu Australia mós anunsia ona atu apoia vasina ne’e no iha tempu besik sei to’o Timor-Leste. Enkuantu apoiu Xina ne’e ba faze datoluk nian.

Tuir dadus atual, kinta ohin (22/4), relata katak prosesu vasina AstraZeneca hahú loron lansamentu dahuluk to’o ohin (loron 14), utiliza ona vasinasaun AstraZeneca hamutuk rihun 18.447, vasina ba abitante liña oin hamutuk rihun 18.447, no restu hela 8,706.

 

Jornalista: saturnina da Costa

Editor: Jose Sarito Amaral

Read 322 times Last modified on Kinta, 22 Abril 2021 22:56
Rate this item
(0 votes)