“Ita hare realidade ko’alia buat ne’ebé ita bele haree, iha estrada públiku ita bele hatete dalan di’ak mak dalan protokolu de’it, hahú husi Dili-Likisa ba to’o Maliana ne’e dalan kaber hotu, maibé dalan ida ne’ebé ligadu ba area remotas, hahú husi Kame Lara to’o Daru Lete, Asu Manu, no Lokilai, liga suku 7, Postu Likisa laran tomak bele mós sai ba to’o Ermera, dalan ida ne’ebé at teb-tebes, oinsá ho Ministériu Obras Públiku (MOP) nia hanoin,” Xefe Suku Loidahar, Domingos dos Santos hateten iha diálogu aberta ho PR Lú Olo iha Salaun Tokodede Likisa Vila, Sesta (17/12).
Nia husu ba Xefe Estadu atu hato’o direita aspirasaun povu nian ba Governu liu-liu MOP atu tau atensaun bele hatama iha planu 2022 nune’e hadi’a netik.
Nune’e mós Xefe Suku Dato, Oscar da Silva hato’o preokupasaun ba MOP atu haree no tau atensaun mós ba estrada ba aldeia Kamale Hohoru no aldeia Pukilara, mota estraga daudauk Likisa Vila, haree estrada rai rahun maka suar hanesan ahi suar sira, bele karik tau netik aspal atu bele fasilita ema hotu asesu.
Hatan ba preokupasaun hirak ne’e, Vise Ministru Obras Publiku (MOP), Nicolau Lino Freitas, hateten ho orsamentu ne’ebé prevee ba iha projetu foun, ba iha estrada kuaze millaun $8.4 kompostu husi rehabilitasaun estrada Lisadila ba iha Loes ho kilmetru 24, Nune’e mós Maumeta ba iha Metagou ho kilometrus 7, Metagou ba iha Bazartete kilometrus 3, Bebuduri ba iha Leboka Laku kilometru 5.
Ne’e duni, husi pakote 22 sira ida ne’e, maiória Xefe Suku sira husu tama hotu ona iha planu, iha ida-rua mak seidauk tama, ne’ebé sei fila ba Dili haree didi’ak atu bele enkaixa iha OJE 2022.
