Xefe Estadu kondekora Reprezentante PNUD iha Timor-Leste ne’e bazeia ba dekretu-lei n.0 20/2009, loron 6 fulan Maiu, hodi rekoñese sidadaun nasionál no estranjeiru ne’ebé presta ona atividade profissionál, sosiál no espontánea kontribui signifikativamente ba benefísiu Timor-Leste, Timor oan no ba umanidade.
Xefe Kaza Sivíl Prezidénsia Repúblika, Bendito dos Santos Freitas, mak reprezenta Prezidente Repúblika, hodi entrega medalla ba kondekorada.
Reprezentante PNUD iha Timor-Leste, Munkhtuya Altangerel (Tuya), dezempeña ona atividade boot sira ne’ebé importante tebes ba povu iha área hotu-hotu ba dezenvolvimentu nasionál iha Timor-Leste durante ninia perkursu hahú iha 2019 to’o juñu 2023.
“Ita-nia nasaun konsege hakat liu dezafius lubuk ida no atinji mós susesu iha área dezeterminasaun ba dezenvolvimentu hanesan atividade ne’ebé realiza husi Reprezentante PNUD durante hala’o missaun iha Timor-Leste,”Online INDEPENDENTE sita iha komunikadu.
Entretantu, Timoroan barak mak benefisia husi esforsu ne’ebé Reprezentante PNUD iha Timor-Leste, Munkhtuya Altangerel manifesta durante tempu naruk iha Timor-Leste. Tan ne’e, servisu ne’ebé Munkhtuya Altangerel hala’o ona ba Timor-Leste, merese duni hetan rekoñesimentu no valorizasaun husi estadu Timor-Leste.
