Ekipamentu ne'ebé entrega husi Governu Xina hamutuk 12, kompostu husi Holter ECG (LEPU) neen (6) no laptop neen (6).
Ministra Saúde Odete Maria Freitas Belo hatete, pedidu ne'e haruka kleur ona, maibé Ospital Nasionál Guido Valadares (HNGV) nafatin iha oportunidade hodi simu ekipamentus hira ne'e.
"Pedidu ne'e ita haruka ba kleur ona, maibé ohin ita nafatin iha hodi simu ekipamentus ne'ebé entrega husi Governu Xina ba HNGV ne'ebé espesialmente liga ba fuan nian," dehan Ministra Iha Salaun HNGV, Sesta (16/06).
Iha fatin hanesan, Médiku Espesialista Herculanu Seixas do Santos hatete, utilidade husi mákina Holter ECG atu halo gravasaun ba fuan ho nia durasaun 24 oras.
Nia dehan, makina hirak ne'e sei oferese mós ba Hospital referal sira hanesan, iha Dili rua (2), Maubisse ida (1), Baukau ida (1), Maliana ida (1) no Rejiaun Administrativa Espesial Oekussi Ambeno (RAEOA) ida (1).
No ekipamentus hirak ne'e fahe ba munisipiu, tanba iha munisipiu haat ne'e mós iha ona kadeorlojista, atu nune'e bele atende ba pasiente sira ne'ebé persiza urjente.
"Objetivu husi estudu ne'e atu bele deteta tipo moras fuan nian. Tipo rinto fuan nia ida ne'ebé mak normal no ida ne'ebé mak la normal, depois mak fó tratamentu ba baze husi rezultadu mákina ne'e," nia esplika.
Nia dehan, antes ne'e iha ekipamentu konaba kadeorlojia nian ida de'it no susar tebes atu atende ba pasiente sira no halo sira tenki hein.
“Maibé ekipamentus agora mai tan ona, hodi bele atende pasientes sira durante 24 oras nia laran,”dehan nia.
Nia haktuir, moras ritmo fuan ho tipo oioin iha TL aas tebes, koalia kona-ba Médiku sufisiente ona, maibé atu halo intervensaun espesifiku sira ne'e seidauk sufisiente.
Enkuantu, Médiku Espesialista kadeorlojista iha Timor-Leste hamutuk na'in sia, kompostu husi Tmoroan nain sia (9), Kubano ida (1) no Xeneze ida (1).
Médiku hirak ne'e, halao servisu iha Hóspital Referal Baukau na'in ida (1), Maubissi ida (1) , Maliana ida (1), RAEOA na'in rua (2) no HNGV na'in lima (5).