Tanba vizita ida ne’e, nu’udar vizita amizade nian entre Governu Japaun ho TL ba área kooperasaun ne’ebé estabelese tiha ona desde restaurasaun independénsia iha tinan 2002.
No Pontu importante ida husi vizita ne’e mak kona-ba prezensa Ró JS MURASAME husi Japaun ne’ebé sei para iha teritóriu Timor-Leste nian durante loron tolu - hahú husi loron 12 to’o 14 abril.
Ministru Defeza Kontra-Almirante Pedro Klamar Fuik, hateten katak vizita husi Ró MURASAME ne’e atu intensifika TL ho Japaun nia kooperasaun iha ámbitu defeza, liu-liu hodi fortalese seguransa marítima.
“Vizita husi Embaixador ho Ofisiál Komandu la’os de’it atu fortalese ita-nia relasaun bilateral entre Timor-Leste ho Japaun, maibé mós ho objetivu atu intensifika ita-nia kooperasaun iha área defeza no seguransa, liu-liu ba seguransa marítima," dehan Ministru liu husi Komunikandu ne'ebé Online INDEPENDENTE sita.
Governante dehan, tanba rai ida ne’ebé evoluídu liu ona bele ajuda rai ida ne’ebé foin hahú dezenvolve hodi asegura sira nia tasi, estabilidade, seguransa no prosperidade. No vizaun ida ne’e mak Ró MURASAME mai hodi extende paz no prosperidade ba Timor-Leste tuir mehi ne’ebé iha.
Iha fatin hanesan, Embaixador Tetsuya KIMURA hato’o agradese wain ba governu Timor-Leste, liu-liu Ministru Defeza ne’ebé bele simu ekipa husi Ró MURASAME hodi bele hametin liu tan relasaun entre nasaun rua ne’e.
Vizita ida ne’e hanesan vizita amizade entre Ministru Defeza Japaun no Timor-Leste hodi bele troka experiénsia no hariku malu liu tan entre militár rai rua nian liu husi amizade mo treinamentu hamutuk.