Tuir Dosente UNTL, Vitor Soares, hatete, Timoroan sira ne’ebé moris iha tinan 1999 to’o mai iha 2022, senti orgullu iha loron konsulta popular ne’e, tanba sira bele hola parte iha ukun rasik aan ne’e.
“Loron ohin nu’udar loron determinasaun ba ukun rasik aan, tanba ne'e, loron 30 fulan-Agustu 2022, sai espasu ida ne'ebé brilante ba Timoroan hotu,”dehan nia iha Jardim 5 de Maio, tersa horseik (30/08).
Nia hatutan, hanesan sidadun ida, bele halo reflesaun ba ida-idak nia aan hodi hanoin katak, saida mak halo hodi kontribui ba ukun rasik aan ne’e.
Nune’e, tempu ona atu servi no dezenvolve povu agora, ida-idak halo reflesaun ba aan rasik, katak mai hamutuk luta ba povu nia moris diak no nasaun.
“Prosesu oinsa mak ita bele hetan indepedensia, entaun ita mós halo reflesaun ba aan rasik, husi prosesu saida mak ita bele dezenvolve nasaun Timor- Leste,”haktuir nia.
Tanba ne’e, nia dehan, Timor-Leste kompleta ona tinan 23 konsulta popular, konsidar hanesan joven ona, nune’e lider ukun na'in sira tenki mai ho prinsipiu ida katak, nafatin luta ba dezenvolvimentu nasaun nian.
Iha fatin hanesan, komunidade ne’ebé hela iha area jardim 5 de Maio, Julieta da Costa, senti kontente, tanba loron ida ne’e, hanesan loron liberdade ema hotu nian, ba ukun rasik aan.
Maibé iha parte seluk nia senti triste, tanba maluk balun iha area rurais sei moris terus no lahetan direitu ba Liberdade.
Nune’e, mós povu barak seidauk ba infraestrurura bazika liu-liu, bee moos, eletrisidade no estrada.
Tanba ne’e, nia husu Governu no Estadu atu ba futuru, tenki kria kondisaun ne’ebé diak ba povu, liu-liu edukasaun ba ema hotu.