Nia hatutan, total timoroan ne’ebé servisu iha Korea Súl hamutuk 4.899 no balun fila ona mai Timor-Leste tanba kontratu remata.

Governu Korea nafatin simu relatoriu kona ba timoroan ne’ebé hala’o servisu, tan ne’e, nia parte seidauk hatene númeru traballadór ne’ebé komete aktu ka halai husi sistema.

Maibé, nia dehan, dadauk ne’e traballadór ne’ebé eziste hela hamutuk na’in 3.926.

"Husu nafatin ba alin sira labele komete aktu ilegal, tenke aprende buat diak, tanba sei iha impaktu negativu ba timoroan sira ne'ebé atu tuir ba servisu iha Korea,"dehan nia iha Ótel Timor Logde, kuarta horseik (12/10).

Embaixadór ne’e akresenta, Governu Korea sei foti sansaun ba traballadór timoroan ne’ebé servisu iha Korea Súl bainhira komete aktu illegal ruma.

Ho nune’e, nia haktuir, Governu Korea nafatin halo monotorizasaun ba traballadór sira nia movimentasaun, atu labele komete bebeik errú hirak ne’e.

Iha fatin hanesan, Sekretariu Estadu Formasaun Profisional no Empregu (SEFOPE) Alarico do Rosario hateten, Governu Timor-Leste liu husi SEFOPE sei koalia ho Governu Korea Súl hodi bele resolve situasaun kona ba traballadór sira ne’ebé halai ses husi sistema ka kometa aktu illegal,  nune'e iha futuru labele fo impaktu ba timoroan seluk.