SS, Inan-Aman Triste Oan La Ba Eskola Featured

By Gregorio Leo Da Costa Abril 30, 2021 390
Aman ba Estudante, Julito Afonso. Aman ba Estudante, Julito Afonso.

DILI:Situasaun reativasaun serka sanitária no konfinamentu obrigatóriu iha kapital Dili, difikulta oan sira la ba eskola nune’e halo inan-aman triste.

Julito Afonso hatete, hanesan komunidade no povu Timor-Leste respeita no prontu submete ba desizaun saida deit mak Governu fó, maibé nia sente triste tanba oan-sira nia estudu durante fulan hirak nia laran laiha aula aprendizajen.

“Nudar aman ha’u sente triste tanba ho Serka sanitáriu ne'e servisu barak mak la hala’o no oinsa ho ami nia oan sira nia prosesu aprendizajen paradu,”dehan nia iha fatin Comoro, (30/04).

Nia prekupa tebes ho prosesu aprendizazen ne’ebé liu husi online, tanba laiha telefoné di’ak hanesan telephone android atu oan sira asesu ba eskola online.

Tuir nia, Governu foti desizaun ida tenki hanoin mós povu kiik sira nia preukupasaun.

Iha fatin hanesan, komunidade Benvinda da Costa Hornai hatete, sira prontu atu kumpri ba desizaun Governu nian, maibé labele halo povu kiak sira terus no sofre.

“Difikuldade barak mak ami hasoru iha situasaun serka sanitária no konfinamentu obrigatóriu ida ne’e liu-liu ami ne’ebé hela iha Dili, oan sira barak mak eskola no dadaun hala'o prosesu aprendizazen liu husi online, ami laiha osan atu sosa pulsa,”dehan nia.

Iha fatin ketak, Gil da Costa hanesan badaen nia labele ba buka servisu tanba serka sanitária no konfinamentu obrigatóriu ema labele sai husi uma.

Nune’e laiha ona osan atu sustenta nesesidade uma laran no sosa pulsa ba oan sira atu hala’o estudu online.

 

Editor: Jose Sarito Amaral

Rate this item
(0 votes)

Independente Digital TV