Prezidente Sentru Lojistiku Nasionál (SLN), Antonio de Araujo Soares hatete, tarjetu ne’ebé SLN iha mak atu sosa haré kulit to’o tonelada rihun ida.
"Tinan ne’e ami nia tarjetu hakarak sosa haré kulit husi agrikultór hamutuk tonelada rihun ida, maibé iha faze primeiro sosa ona tonelada 200," dehan António, ba Jornalista INDEPENDENTE, iha nia knaar fatin, Kolmera, Kuarta (03/09).
Semana oin, nia hatutan, sei sosa tan haré kulit husi asosiasaun no kontinua sosa iha faze daruak nian husi agrikultór sira iha munisípiu Bobonaru no Ermera .
"Governu kada tinan tau osan sosa povu agrikultór nia haré kulit maibé depende ba produsaun haré nian ho kuantidade aas governu bele sosa hodi tau iha armajen, bainhira mosu dezastre ruma Governu bele foti hodi atende emerjénsia," nia dehan.
Orsamentu ne’ebé prepara ba sosa haré kulit hamutuk rihun $450.
"Sosa haré kulit husi komunidade kilo ida ho folin $0,45 sentavus. Se komunidade lori rasik mai faan iha ami ho folin $0,50 sentavus, tanbá sura ho transporte ba-mai," dehan nia.
Iha parte seluk, agrikultor ida husi Postu Administrativu Maliana, Munisípiu Bobonaro, Maria Rita Soares hatete, durante ne’e SLN sosa duni sira-nia haré kulit.
"Durante ne'e SLN sosa duni ami-nia haré kulit, maibé ladún barak entaun ami deside ami nia haré dulas de’it mak lori ba faan iha merkadu," dehan nia.
