Segunda, 25 Outubru 2021 | Login
Diretór SIJK, Brigadeiru Jeneral João Miranda “Aluk” hasoru-malu ho PM Taur hodi diskuti situasaun neebé relasaun ho pandemia Covid-19. Foto:Media PM Diretór SIJK, Brigadeiru Jeneral João Miranda “Aluk” hasoru-malu ho PM Taur hodi diskuti situasaun neebé relasaun ho pandemia Covid-19. Foto:Media PM

SIJK Hasoru PM Taur, Posibilidade Hakotu SS iha Dili Featured

DILI: Ho númeru kazu pozitivu foun neebé hahú tuun ba beibeik, iha posibilidade atu hakotu Serka Sanitaria (SS) iha kapital Dili neebé governu hanaruk tan ba loron 7. Posibilidade nee mosu hafoin ekipa Sentru Integradu ba Jestaun Krize (SIJK) hasoru-malu ho Primeiru Ministru Taur Matan Ruak.

Iha Kuarta (22/09), Konsellu Ministru deside hodi hanaruk periodu SS iha Dili ba loron hitu tan, hahú husi 23 too 29 Setembru.

Horseik, Diretór SIJK, Brigadeiru Jeneral João Miranda “Aluk” hasoru-malu ho PM Taur hodi diskuti situasaun neebé relasaun ho pandemia Covid-19.

“Apesar ke iha Kuarta ami halo aprezentasaun iha Konsellu Ministru situasaun jeral iha ita-nia rai laran, liu-liu kona-ba moras Covid-19, númeru nee ita haree komesa tuun, ohin ami nain rua koalia hela provavelmente proxima konsellu ministru se situasaun nee mantein ho nivel ida agora husi konsellu ministru deside halo levantamentu ba iha serka sanitaria iha kapital Dili,” dehan Aluk hafoin enkontru ho PM Taur iha palasiu governu, Kinta (23/09).

Ba kestaun nee, nia hatete, PM Taur mós aseita karik númeru kazu pozitivu mantein ho nivel neebé iha daudauk nee, bele levanta SS iha Dili.

Molok nee, Ministru Prezidensia Konsellu Ministru, Fidelis Manuel Leite Magalhães informa, Konsellu Ministru deside hakotu Serka Sanitaria (SS) iha Munisípiu Baukau, Ermera no Kovalima. Enkuantu mantein SS iha Munisípiu Dili ba loron hitu tan.

“Konsellu Ministru mós ohin deside la estende serka sanitaria iha Munisípiu sira hanesan tuir mai: Munisípiu Baukau, Kovalima no Ermera neebé mak sira-nia serka sei vijensia hela hotu orsida (horikalan) kalan tuku 11:59. Konsellu ministru deside estende serka sanitaria iha Munisípiu Dili ba periodu loron hitu,” dehan Fidelis.

Ho desizaun ida nee, SS iha kapital Dili sei kontinua iha 23 no sei termina iha 29 Setembru tinan nee.

“Desizaun hirak nee konsellu ministru hola tanba konforme aprezentasaun husi sentru integradu jestaun krize no espesialista saúde nian sira katak ita-nia situasaun pandemia nee komesa hatudu sinál diak fali ona kompara ho semana hirak kotuk,” nia hatete.

Read 1201 times
Rate this item
(0 votes)