Tuir komunikadu ne’ebé Jornalista Online INDEPENDENTE asesu husi Pajina Servisu Relasaun Publika Ministeriu Interior, haktuir katak, Iha inspesaun ne’e, ekipa servisu notifika sidadaun na’in- 6 ne’ebé servisu iha kompañia estranjeiru, sira halo violasaun ba Lei Migrasaun no Ázilu númeru 11/2017. Sidadaun estrajeiru na’in-6 ne'e kompostu husi sidadaun Indonesia na’in-5 no Xina na’in-1.
Tanba ne’e ekipa asegura kedas sidadaun estranjeiru sira ne’ebé kontra Lei Migrasaun no Ázilu ne’e no fó notifikasaun hodi aplika kedas sansaun selu multa.
“Nune'e, karik identifika tán aktu krime seluk maka sei submete ba iha Ministériu Públiku atu prosesu kriminál nian tuir lei ne'ebe eziste,”haktuir komunikadu ne’ebé Online ne’e sita, sesta (12/12/25).
Komunikadu ne’e haktuir tan katak, ekipa konjunta mós rekolla ona sidadaun estranjeiru sira-nia pasaporte no halo hela prosesu investigasaun hodi aplika prosesu administrativa selu multa ba estadu, tanba lei la fó dalan ba vistu turista atu halo kualker atividade profesionál iha territóriu nasionál.
Enkuantu, ekipa konjunta ne'e halo operasaun kontrola iha fatin servisu sira, otel, no área turístiku sira, hodi verifika dokumentus no kondisaun servisu sidadaun estranjeiru sira.
Iha operasaun ne'e, ekipa konjunta hetan sidadaun estranjeiru sira ne'ebé uza vistu turista hodi halo servisu sira hanesan, balun, servisu doméstiku, servisu konstrusaun, servisu turizmu, balu servisu seluk.
Inspesaun konjunta ne’e, envolve Inspetor Jeral Traballu, Frederico Pereira de Matos, hamutuk ho Diretora Apoiu Tekniku-IGT Otilia Maria Pereira, enkuantu parte Migrasaun nian maka Xefi Setor Permanensia Estranjeiru, Paulo Soares Freitas no-mos Xefi Divizaun Fizkalizasaun, Inspetor Asistente Polisia, Jacinto Ximenes.
Entretantu, sidadaun estranjeiru sira ne'ebé uza vistu turista hodi halo servisu sei infrinja lei imigrasaun no regulamentu servisu nian.
Nune’e, tuir Lei Imigrasaun Timor-Leste, sidadaun estranjeiru sira ne'ebé uza vistu turista hodi halo servisu sei hetan kastigu. Iha mós kastigu ba empregador sira ne'ebé halo kontratu servisu ho sidadaun estranjeiru sira ne'ebé la'os iha permitisaun servisu, hanesan aplika multa ka kastigu prizaun ka halo deportasaun no provoisaun atu tama fila mai Timor-Leste dentru to'o tinan 5 ka 10.
