Sekretariu Estadu, Elizáriu Ferreira hatete, SeKoop kopera ho Autoridade lokal sira, hodi halo levantamentus ba dadus familia afeitadu sira husi dezastre naturais, nune’e apoia netik nesesidade bazika balun hodi sustenta sira nia moris.
Enkuantu, Levantamentus dadus familia afeitadu 316 ne’e, hahú iha loron 5 fulan-Abril, maibé lakonsege fahe iha tempu ne’ebá, nune’e ohin mak hahú fahe apoia hirak ne’e.
“Justifikasaun primeiru, Sekoop husu deskulpa ba komunidade sira tanba apoia ne'e tarde, maibé ho esforsu ne'ebé ita halo, oinsa atu bele hetan apoia ruma husi Governu,”dehan nia iha Sede Suku Komoro, sesta ohin (02/07).
Entretantu, apoia ne’ebé SeKoop fó, kada familia uma-kain ida sei hetan fós saka 1, supermie kaixa 1 no sabaun.
Nia akresenta, apoia ne’e hanesan, bukae ida hodi bele sustenta netik moris ba loron balun.
Enkuantu, tuir planu apoia ne’e sei halo mós ba iha Munisipiu sira, hafoin iha Dili remata.
Governante ne’e, husu ba komunidade sira ne'ebé lakon sasan no uma bele hato’o ba Autoridade lokal sira atu bele rezistu liu husi Ministeriu Administrasaun Estatal (MAE) no Ministeriu Solidaridade Sosial no Inkluzaun (MSSI), atu nu'une bele hetan apoia ruma husi Governu.
Entretantu, Delegada Aldeia Moris Foun, Maria Madalena Suharto hatete, ho apoia SeKoop nian bele hakman ona sira nia difikuldade ne’ebé sira hasoru durante iha situasaun dezastre naturais no mós Covid-19.
Nia afirma, iha situsauan pandemia ne'e laos feto deit mak hetan susar maibé ba mane hotu.
Tanba ne’e, nia husu ba Governu bainhira atu fó apoia, labele haree deit ba feto faluk no kbiit laek, maibé hare mós ba mane sira ne’ebé kbiit lato’o atu halo servisu sustenta nia moris.
Asistente Editor: Saturnina da Costa
