Sekretáriu Estadu Komunikasaun Sosiál Expedito Loro Dias Ximenes hatete, proposta inisiál OJE 2026 ne'ebe SEKomS aprezenta ba Ministeriu Finansas iha millaun $8, maibé Ministério Finansas (MF) halo analiza no aprova deit tetu miliaun $4,5.
“Ami husu adisionál millaun $2,5 ne’e atu reforsa no kontinua nafatin saláriu vensimentu ba funsionáriu kontratu no kazuál sira hamutuk ema na’in 157 iha SEKomS no mós husu nafatin orsamentu rihun $100 atu apoiu ba iha jornalista sira, atu halo kobertura ba atividade Primeiro-Ministru nian iha nasionál no internasionál,” dehan nia ba Jornalista sira, hafoin remata diskusaun iha komité Revizaun iha Ministeriu Finansas, Kuarta (13/08).
Nia hatutan, iha proposta adisional ne’e, SEKomS propoin mós millaun $1 atu hodi instala torre transmisaun tolu iha Lospalos, Ainaro no Bobonaro, ne’ebé dadauk ne’e pronto ona.
Tore tolu ne’e ho objetivu atu alarga kobertura RTTL ba território timor laran tomak.
Enkuantu, rihun $400 iha adisional ba Rádiu Televizaun Timor-Leste Empreza Públiku (RTTL,E,P) atu garante transmisaun Kopa Mundial 2026, ne’ebé sei halo iha kooperasaun ho ETO.
Aleinde ne’e, adisional rihun $15 sei aloka ba RTTL,E,P atu sosa ekipamentu dijitál ba broadcasting nian.
Expedito dehan, tetu orsamentu 2026 ba Ajensia Notísiozu TATOLI,IP, hamutuk rihun $500 resin no sira mós iha adisional rihun $400 resin atu bele reforsa ekipamentu informátika dijitál.
Entretantu, programa prioridade ne’ebé SEKomS sei kontinua implementa iha tinan oin maka hanesan,
Formasaun ba jornalista, ne’ebé parseria ho Institutu Camões liu husi Programa CLJ atu aumenta kapasidade jornalista sira iha lian portugés no iha transferénsia públika sei kontinua ba RTTL, asosiasaun jornalista, rádiu komunidade no Sentru Audiovizual Max Stahl, ne’ebé sei transforma arkivu analok ba dijitál.
Enkuantu, Ezekusaun OJE 2025 ba SEKomS to’o agora atinje ona 59,5%, husi orsamentu $6.038.535, ne’ebé aloka ba salariu vensimentu $1.619.260, bens servisu $767.835, tranferensia públiku 2.751.440, kapital menór 0 no kapital dezenvolvimentu 900.000.
