Prezidente INCSIDA, Daniel Marçal hatete, Timor-Leste iha fulan-Outubro tinan ne'e, adere ona membru plenu ASEAN nian, nune’e, Timor-Leste sei nakloke liu tan atu ema tama sai.
Tanba ne’e, jovem sira tenki kuidadu saúde no perpara-an makas liu tan hodi bele kompete ho nasaun sira seluk.
"Sira atu kompete ho nasaun sira seluk importante saúde tenki di'ak,objetivu enjeral governu nian hare katak Natarborasei harii buat importante ida iha ne'e, se mak atu servisu iha ne'ebá nee jovem sira ema mai husi liur nee oituan de'it ita hakarak jovem sira iha ne'e mak tenki okupa fatin sira ne'ebé importante tanba sira nia rai," dehan Prezidente INCSIDA ba Jornalista sira iha Sede suku Uma Boco, Tersa (12/08).
Nia hatutan, jovem sira iha Suku Uma Boco, Postu Administrativa Natarbora tomak, tenki komprende katak saúde ne’e importante, tanba saúde diak maka bele halo buat hotu, maibé bainhira saúde la di'ak maka sei la halo buat ida.
“Jovem sira kuidadu saúde, prepara-an didiak, atu aban bainhira bele goja buat ne'ebé ita nia estadu planeia hela atu halo iha ne'e, nune’e labele ansi atu kaben sedu,” katak Daniel.
Daniel Marçal mós husu ba inan-aman sira atu fó atensaun no hanoin nafatin ba oan sira katak kria hakmatek no dame iha uma laran atu oan sira labele sai hodi buka iha liur, rona lia na'in sira kuidadu kultura, atu nune’e labele fó oportunidade ba kultura seluk hodi destroi sira nia moris, futuru no dignidade.
"Ne'ebé na'i ulun sira iha Natarbora Manatuto tenki koiñese didi’ak no hili didi’ak para bele proteje komunidade sira nee husi moras sira ne'ebé ameasa ba saúde komunidade nian," nia hakotu.
