SEII Realiza Konsultasaun ba Revizaun PAN-VBJ ho Sosiedade Sivil Featured

By Agustino Santos Gama Novembru 15, 2021 266
Diretóra Nasionál ba Politika Violensia Bazeia ba Jéneru husi SEII, Maria Filomena Babo Martins. Foto: Agostino/INDEPENDENTE. Diretóra Nasionál ba Politika Violensia Bazeia ba Jéneru husi SEII, Maria Filomena Babo Martins. Foto: Agostino/INDEPENDENTE.

DILI: Sekretária Estadu Igualdade no Inkluzaun (SEII) realiza konsultasaun no halo revizaun ba Planu Asaun Nasional (PAN) Violensia Bazeia ba Jeneru (VBJ), hamutuk ho rede referal sira.

“Enkontru ida ohin ho rede referal sira hanesan mós implementador ba PAN-VBJ, nune’e ami konvida sira  mai atu identifika pasu saida mak presiza atu tau mós iha PAN-VBJ, ba faze datoluk nian ba periode tinan 2021-2026 nian,”dehan Diretóra Nasionál ba Politika Violensia Bazeia ba Jéneru husi SEII, Maria Filomena Babo Martins, iha salaun Delta Nova, segunda ne’e (15/11).

Nune’e, SEII hamutuk ho rede referal sira halo diskusaun kona ba dezafiu saida mak sira hasoru, atu nune’e ba oin saida mak sira rekomenda atu tau ba PAN-VBJ iha faze datoluk nian.

Tuir nia, iha lei kontra violensia domestika nian, dehan katak violensia ne'ebé akontese ba feto no labarik feto  ida ne’e krime. Ho nune’e, kazu sira ne'e presiza hato'o ba instituisaun relevantes sira, nune’e vitima sira bele hetan justisa.

Iha lei kontra violensia Domestika iha artigu 13, husu saida mak Governu nia knar atu kombate ba violensia domestika iha Timor-Leste. Nune’e estadu ka Governu nia knar mak halo PAN-VBJ hodi kombate Violensia Bazeia ba Jeneru.

Nia hateten, presiza halo revizaun ba PAN foun ne’e no halo konsultasaun ho entidade hotu, hahú husi Governu, Sosiedade Sivil, no ema individual husi nasional ba to'o iha munisipiu.

"Iha revisaun ne'e atu ita bele hatene katak atinjimentu saida mak ita atinji ona no saida mak ita presiza halo ba  kazu sira ne'ebé kontra violensia domestika no krime ne'ebé hato'o ona ba polisia no Ministeriu Publiku,”tenik nia.

Iha fatin hanesan, Diretóra Fundasaun Codiva, Laura Afonso de Jesus, hatete, revisaun ba PAN-VBJ normalmente nia validu ne'e to’o tinan 5 remata ona.

Ho nune’e, iha revizaun PAN-VBJ ho objetivu atu hare’e fali parte ne'ebé presiza atu aumenta no hamenus.

Entretantu iha revizaun ba PAN-VBG ne'e hetan pastipante sira husi sosiedade sivil no rede referal sira hanesan, Pradet, Fokupers, Alfela, Codiva, Patria, Casa-Vida, Mane ho Vizaun Foun, Arquiris, Plan Infernasional, Care Internasional, Belun, CathOilic Relief Service, UN Women-Spotlight, UNFPA, TAF-Nabilan, JSMP, PDHJ, Rede-Feto no Fundasaun Alola.

 

Asistente Editor: Saturnina da Costa

Rate this item
(1 Vote)

Independente Digital TV