MS Aloka Tokon U$5.4 Sosa Aimoruk ba Moras Covid-19

By Gregorio da Costa Novembru 15, 2021 294
Ministra Saúde, Odete Maria Freitas Belo, simu simu aimoruk ne'ebe' intrega husi Reprezentante UNDP, Munkhtuya Altangerel. Foto: Grigoriu/INDEPENDENTE. Ministra Saúde, Odete Maria Freitas Belo, simu simu aimoruk ne'ebe' intrega husi Reprezentante UNDP, Munkhtuya Altangerel. Foto: Grigoriu/INDEPENDENTE.

DILI: Ministeriu Saúde hamutuk servisu hamutuk ho United Nations Development programme (UNDP) hodi aloka orsamentu dolar amerikanu tokon U$5.4 hodi sosa aimoruk item 85 ba moras Covid-19.

Ministra Saúde, Odete Maria Freitas Belo, hatete, kona ba orsamentu Ministeriu Saúde mak aloka ba UNDP hodi halo prosesu aprovizonamentu.

Ho nune’e, aimoruk sira ne’ebé UNDP haruka mai ne’e, ba dala tolu ona.

“Orsamentu ne’ebé sosa ona ba aimoruk ne'e total hamutuk dolar amerikanu tokon U$5.4, ho kuantidade aimoruk 85 item,”dehan nia iha Servisu Autonomu Medikamentu no Ekipamentus Saúde (SAMES), segunda ne’e (15/11).

Enkuantu, aimoruk sira ne’ebé UNDP entrega on aba MS mak hanesan, antibiotik, parasetamol, panadol, aimoruk ba moras fuan no mós aimoruk sira seluk tan.

“Item sira ne’ebé ita falta iha Covid-19, ita susar tebes atu halo aprovizonamentu, entaun agora ita identifika kedas aimoruk importante sira hanesan ba fuan nian, hodi atende pasiente sira, bainhira sira hetan moras hanesan moras fuan nian, tensaun, no seluk tan,”tenik nia.

Nia hatutan, aimoruk sira ne'e, UNDP haruka uluk ona balun mai, iha fulan hirak liu ba no MS halo ona distribuisaun ba fatin esesnsial sira hanesan, HNGV, Sentru Saúde no Óspital Rejional sira iha munisipiu.

Tanba ne’e, MS garante  aimoruk sira ne’e bele sufisiente ba Sentru Saúde sira.

“Ha’u espera aimoruk sira ne’ebé iha, bele konfia ba sira nia stok ne’ebé iha,”tenik Odete.

Entretantu, Reprezentante UNDP, Munkhtuya Altangerel afirma, ida ne'e importante liu oinsa atu hare ba iha asuntu aprovizionamentu, tanba agora dadaun nasaun sei iha problema Covid-19, entaun afeita tebes ba iha aprovizionamentu liu-liu ba kompras aimoruk nian.

Tanba ne'e, orsamentu ne'ebé antes ne'e aloka ba iha kompras aimoruk nian, maske atrazu uituan maibé konsege entrega ona.

 

Asistente Editor: Saturnina da Costa

Rate this item
(0 votes)
Last modified on Segunda, 15 Novembru 2021 19:50

Independente Digital TV