Diretór Jerál SEII, Armando da Costa hateten, SEII servisu hamutuk ho ekipa feto prontu lidera no Ministeriu Administrasaun Estatál organiza formasaun ho tema hakbit lideransa komunitária feto iha jestaun lideransa politika no igualdade Jeneru.
“Xefi suku feto sira hamutuk 21 ho xefi aldeia feto sira hamutuk sia hodi bele refresh fali kona bá sira nia lideransa no lala’ok servi iha suku hodi bele fahe esperiénsia ba malu entre sira ho parseiru sira seluk, nune’e mós ko’alia kona-bá jestaun ne’ebé sira hala’o hodi fahe esperiénsia kona-bá ida-ne’e,” Armando da Costa hateten ba Jornalista sira iha salaun Delta Nova horisehik.
Nia konsidera formasaun ne’e importante tebes atu bele oinsa hamutuk ho sira bele trasa estratejia di’ak bele prepara ba hasoru eleisaun ne’ebé sei akontese liu-liu eleisaun suku ne’ebé sei akontese iha tinan oin.
Eleisaun iha tinan 2009 nian ne’e feto iha suku iha porsentu rua deit, maibé iha eleisaun ida foin lalais ne’e iha tinan 2016 ne’e sa’e ba porsentu lima, husi Xefi suku lima sa’e ba 21 no xefe aldeia 22 sa’e ba 93 entaun progresu ne’e iha.
Oras-ne’e atu apoiu sira oinsa ho sira nia esperiénsia sira bele kandidata an fila-fali, segundu bele influensia feto maluk sira seluk atu partisipa, hakarak ne’e iha trend persentajen ne’ebé muda. Pelumenus bele sa’e no labele tun husi númeru atinjimentu ne’ebé agora iha ona.
Nune’e mós xefe suku Manukase Postu administrativu Lequidoe, Munisipiu Aileu, Juliana Imaculada hateten, atividade ida ne’e importante maski asumi ona kargu hanesan lider komunitária tinan 6 ona, hela tinan ida mandatu atu remata, maibé liu husi formasaun ida ne’e atu bele hakbiit feto sira kona ba jestaun ka lideransa politika igualdade éneru no prepara mós ba eleisaun Parlamentar nian.