Peskizadór AJAR, Inocencio de Jesus Xavier, ne’ebé ativu iha asaun hasoru Parlamentu Nasionál, iha 15 to’o 17 Setembru hatete, bainhira koalia kona-ba problema sosial ne’e iha problema ne’ebé barak tebes.

Problema hirak ne’e, nia hatete, tama hotu ona iha ajenda sosiadade sivil no Estudante Universitariu Timor-Leste (EUTL).

"Tuir mai ita mós sei haree ba asesor internasionál sira ne'ebé durante ne’e sira simu osan barak, sira halo problema iha nasaun, ita hurlele malu ita-nia líder sira, sira hemu kafé iha otél sira hateke ita, ida ne'e sai ajenda ida mós ba EUTL," dehan Inocencio ba Jornalista Jornál INDEPEDENTE, iha nia kna'ar fatin, Faról, Tersa (30/09).

Sosiadade sivil ho EUTL, nia dehan, hahú ona ho lider no fundador estadu nian, no sedu ka tarde sei to’o iha asesor sira.

"Ami hahú ho ami-nia líder fundadór estadu sira, ami-nia líder rezisténsia sira, ami sei to'o iha asesor internasionál sira. Ami hatete ona ba diskusaun, ha'u mós semana kotuk ne'e ko'alia ona ho povu sira iha Natarbora, fó informasaun ba komunidade sira katak ita-nia luta falta ida tan mak asesor internasionál sira," nia hatete.

Tuir nia, durante tinan 20 resin, asesor internasional sira simu ona salariu ne’ebé boot liu titular orgaun soberanu sira.

“Asesor estranjeiru inklui Timor-oan balun ne'ebé kaer pasaporte rua, mai lakohi uza pasaporte nasionál, uza pasaporte internasionál nune'e simu esklaun ida nivél internasionál, ne'e mós iha hotu.”

Tan ne’e, nia afirma, ajenda luta ba EUTL no sosiadade sivil inklui mós asuntu ne’e.

Aleinde ne’e, nia hatutan, ajenda ida seluk mós mak kona-ba lei salariu minimu ne’ebé to’o ohin loron seidauk iha mudansa.

"Klaru katak lei saláriu mínimu ne'e mós ita sei to'o iha ne'eba,” dehan nia.

Vise Direitór Dahuluk Asosiasaun HAK, Antonino de Limas afirma, EUTL no sosiédade sivil tenke konsiste atu luta nafatin ba injustisa ne'ebé mosu iha TL.

Saláriu ba asesor sira ne’ebé boot, tuir nia, nu’udar prátika ne'ebé durante tinan barak akontese.

"Ne'e ita haree ho saláriu mínimu iha funsionáriu públiku ne'e iha deskrepansia, ne'e ita seidauk kompara traballadór sira manan osan kiik, saláriu mínimu $115 to'o agora ida ne'e mantein,” dehan nia.

Iha tinan hirak liu ba, nia hatete, partidu polítiku sira iha ninia kampaña promete atu hasa'e salariu minimu to'o $150-$200, maibé bainhira ukun sira ‘budu’ lei saláriu mínimu ne'e.

"Se temi luta, ajenda sira ha'u hanoin presiza diskusaun EUTL ho sosiédade sivil atu haree kazu sira prióridade mós atu dudu ba oin,” dehan nia.