Prezidente Repúblika Promulga Ona Orgánika IX Governu Konstitusionál Featured

By Jullu 29, 2023 643
Prezidente Repúblika, José Ramos-Horta. Foto:Media Gabinete PR. Prezidente Repúblika, José Ramos-Horta. Foto:Media Gabinete PR.

DILI: Prezidente Repúblika, José Ramos-Horta, promulga ona Dekretu-Lei n.º 46/2023, loron 27 fulan Jullu, ne'ebé aprova Orgánika Governu Konstitusionál IX.

Estrutura orgánika Governu Konstitusionál IX, define atribuisoens husi Ministériu idaidak no atribui kompeténsia ba membrus Governu, tuir prioridades ne'ebé define ona iha nia Programa.

Governu Konstitusionál IX simu pose iha loron 1 fulan-julhu tinan 2023, hodi, durante tinan lima, retoma dalan ba dezenvolvimentu sosial no ekonómiku.

 Programa Governu nian, ne'ebé hetan apoiu unánime iha Parlamentu Nasionál, hanesan instrumentu polítiku ne'ebé orienta Governu iha tinan lima nia laran, hodi retoma roteiru ne'ebé Timor-Leste define ona hodi kumpre "Agenda 2030 ba Dezenvolvimentu Sustentável husi Organizasaun Nasoes Unidas" no Planu Estratéjiku ba Dezenvolvimentu (2011-2030), ho objetivu hodi alkansa progresus konkretus ba dezenvolvimentu sustentável no dezenvolvimentu sosial efetivu.

Entre prioridades ne'ebé Governu Konstitusionál IX estabelese ona, enfatiza diversifikasaun ekonómika no kriasaun empregu, ho destake ba área agrikultura, peska, pekuária, turismu no estabelesimentu indústria ki'ik no média, hodi hamenus dependénsia ba importasaun no promove dezenvolvimentu autossustentável.

Governu sei investe, ho efisiente no efikás, iha área fundamentál tolu - kapital sosial, dezenvolvimentu infraestrutura no dezenvolvimentu ekonómiku - alisersada iha  kompeténsia, profisionalismu, onestidade no transparénsia.

Estrutura Governu Konstitusionál IX hakarak destaka servisu báziku ba populasaun, liuliu iha saúde no edukasaun, no mós hametin metodolojia no operasionálidade administrasaun no jestaun no, mós, implementasaun ba Planu Estratéjiku ba Dezenvolvimentu.

Rate this item
(0 votes)
Last modified on Segunda, 31 Jullu 2023 15:56
Saturnina da Costa

Jornalista Jornal Independente

https://independente.tl

Independente Digital TV