Presiza Koloka Mós EhD iha Formasaun IX Governu Atu Atende ba Nesesidade Defisiensia Nian Featured

By Ivonia Varela Juñu 29, 2023 327
Diretór Ezekutivu Asosiasaun Difisiensia Timor-Leste (ADTL), Cesário da Silva, iha edifisiu INDEPENDENTE, Hudi Laran, kinta (29/06). Foto:INDEPENDENTE/Juliao. Diretór Ezekutivu Asosiasaun Difisiensia Timor-Leste (ADTL), Cesário da Silva, iha edifisiu INDEPENDENTE, Hudi Laran, kinta (29/06). Foto:INDEPENDENTE/Juliao.

 

DILI: Diretór Ezekutivu Asosiasaun Difisiensia Timor-Leste (ADTL), Cesário da Silva,  husu ba partidu politikus rua, hanesan Partidu Demokratiku no Congresso Nacional Reconstrusaun Timor-Leste ne’ebé forma IX Governu, atu envolve ema ho defisiensia iha ne’ebá atu bele hola parte iha Governasaun hodi koalia nesesidade ema ho defisiensia nian.

Tuir nia,  envolvimentu ema ho difisiensia iha partidu politikus hotu kuaze iha, tanba ne’e nia husu atu envolve mós ema ho defisiensia iha formasaun IX Governu.

"Ami atu dehan envolvimentu ema EhD ho partidu rua ne'e kuaze iha hotu kedas. Tanba ne'e hakarak ka lakoi espera partidu rua ne'e bele envolve EhD iha ne'ebá atu bele hola parte iha governasaun hodi bele koalia konaba ba asuntu difisiensia," dehan nia iha Edifisiu INDEPENDENTE, Hudi Laran, Bairu-Píte, kinta (29/06/23).

Nia dehan, maske ema sira ne’e iha difisiensia fiziku, maibé sira iha kapasidade, abilidade no koñesementu hodi atende ba nesesidade EhD nian.

Ezekutivu haktuir, tanba Estadu Timor-Leste iha intensaun ne'ebé boot atu tau aas interese sidadaun hotu nia liliu koalia kona-ba inkluzaun.

Nune'e, Estadu TL hahú uluk ho hanoin ida ne'ebé inkluzivu tebes, hodi hamosu lei baze legais sira ne’ebé atu hatan ba sidadaun hotu ne'ebé konsidera inkluzividade tebes liliu ema ho difisiensia.

Tanba ne'e, atu atende ba nesesidade ema ho difisiensia nian, presiza ema ne'ebé iha seriedade, komitmentu no entendementu ba asuntu difisiensia nian.

Diretór afirma, EhD mós luta ba partisipasaun politika, tanba ne'e rekomenda ba Governu foun atu hola parte EhD iha IX Governu.

“Ho situasaun ida ne'e presiza duni ema ne'ebé ho seriedade, komitmentu no ema ida ne'ebé mak iha entendimentu ba asuntu difisiensia nian, liliu ita ko'alia konaba dezenvolvimentu asuntu difisiensia ne'e presiza duni ema ne'ebé mak iha koñesimentu seriedade no komitmentu atu bele aloka rekursu," tenik nia.

Iha fatin hanesan, Asesor Prinsipal ba Asuntu Sosial iha Gabineti Prezidente Republika,  Gaspar Afonso hatete, ema ne'ebé atu ba ukun, la'ós atu hare ema nia background kona-ba edukasaun hanesan lisensiatura ka mestradu maibé presiza hare ba kapasidade ka esperensia profisoinál.

Nia dehan, durante kampaña eleitoral ne'ebé la'o iha fulan ida liu ba partidu pólitiku sira barak mak ko’alia kona-ba asuntu difisiensia, tanba ne'e fiar katak partidu politikus sira sei la haluha promesa polítiku ne'ebé sira hato'o ona iha palku.

"Ha'u fiar katak partidu CNRT liliu Primeiru Ministru indijitadu sei fó atensaun másimu ba saida mak nia promete iha kampaña," dehan nia.

Rate this item
(0 votes)

Independente Digital TV