Duretir Servusy Autonomu Medikamentu no Ekipamentu Saúde (SAMES) Santana Martins informa, vasina pfizer bainhira armajena iha jileira ultra-malirin, ninia prazu bele to’o fulan rua resin.
Maibé, nia dehan, bainhira muda jileira ho temperatura grau 2 to’o 8 selsiu, nia prazu sei tuun to’o loron 31 ka fulan ida.
“Husi fabrika mai ne’e nia prazu to’o 31 Dezembru, maibé bainhira muda husi jileira ultra-malirin ba jileira grau 2 to’o 8, nia idade iha de’it loron 31,” informa Santana iha salaun Infordepe, Balide, Sesta (22/10).
Tanba ne’e, nia hatutan, bainhira vasina ne’e sai ona husi jileira ultra-malirin, fasilidade saúde sira tenke esforsu atu molok to’o loron 31 bele utiliza hotu.
Aleinde ne’e, nia dehan, vasina refere bainhira loke ona hodi sona ema-nia isin, ninia prazu oras neen de’it.
“Bainhira ita loke ona vasina ne’e ho viel ida ba ema na’in neen, iha oras neen nia laran tenke utiliza hotu, se lae mak konserteja ita estraga ona, tanba nia tempu ne’e menus ba beibeik, tanba ne’e tenke iha jestaun ne’ebé di’ak atu labele estraga vasina sira ne’e,” dehan nia.
Tuir planu, vasina pfizer doze 100.620 ho viel 6.779 ne’ebé iha, sei fó uluk ba labarik sira iha munisipiu Dili.
Entretantu, iha 16 Outubru foin lalais ne’e, Governu Timor Leste ofisialmente simu ona vasina Pfizer doze 100.620 husu UNICEF no tuir planu iha 25 no 26 Outubru sei hahú hala’o vasinasaun ba labarik sira ho idade tinan 12 to’o 17.
“Ami prepara hela data ba lansamentu nian ne’ebé hanoin hela entre loron 25 la’e 26 Outubru ne’e iha Dili, tanba ne’e husu inan-aman sira hotu atu lori oan sira mai simu vasina, tanba sasan iha ona ita-nia liman entaun ita lalika preokupa ona kona-ba ninia efikasia,” dehan nia iha edifisiu SAMES, Kampung Alor, Segunda (18/10).
Ba oportunidade dahuluk nian, Ministra ne’e hatete, sei hala’o vasina iha eskola balun iha Dili no Likisa.
