Liu husi Dekretu-Lei n°55/2020, 28 outubru, mak Estadu Timor-Leste harii Fundu Rezerva Sosiál no define ninia modelu jestaun, iha ámbitu rejime kontributivu foun iha Timor-Leste, Rejime Repartisaun no Fundu Rezerva.
Hafoin tetu situasaun ekonomia mundiál no indikadór ekonómiku no finanseiru, Konsellu Minstrus deside foti medidas balun hodi hasa’e rendimentu ba karteira Fundu Rezerva Seguransa Sosiál, maibé ho risku kiik, atu nune’e, Fundu ne’e fó benefísiu ba beibeik ba sira ne’ebé kontribui fulan-fulan ba rejime kontributivu foun iha Timor-Leste.
“Alterasaun dahuluk ba Dekretu-Lei ida ne’e hetan promulgasaun husi Prezidente Repúblika iha loron 13 fulan-Dezembru 2021,” dehan Xefe Caza Sivil, liu husi komunikadu ne’ebé Online INDEPENDENTE asesu, kuarta ne’e (15/12).
Entretantu, Rejime Kontributivu foun seguransa sosial mak Rejime Repartisaun, obrigatóriu no kontributivu, hanesan, atu hetan direitu ba benefísiu ka prestasaun sosiál, traballador tenki kontribui ba rejime ka kontribuisaun sosiál. Maibé traballador la kontribui mesak iha fulan-fulan, husi taxa kontributiva total 10% husi saláriu mensal tomak, entidade empregadora kontribui ho 6% no traballadór kontribui ho 4%.
Nune’e, traballadór hotu-hotu no nia entidade empregadora kontribui fulan-fulan ba “karteira komum” ka karteira hotu-hotu nian no osan sira ne’ebé akumula iha karteira komum ne’e sei uza atu selu ba prestasaun imediata fulan-fulan, ezemplu: selu subsídiu ba maternidade no paternidade, ba sira ne’ebé sei servisu no kontribui hela ka hanesan jerasaun traballadór.
Aleinde, selu pensaun traballadór reformadu sira nian ezemplu: ema sira ne’ebé la servisu ona maibé kontribui ona ba rejime ka hanesan jerasaun anterior.
Nune’e, osan restu tinan-tinan, hafoin halo pagamentu sira temi iha leten, tama fali iha Fundu Rezerva ida atu garante nafatin sustentabilidade sistema nian. Bainhira kontribuisaun la to’ó atu selu prestasaun sosiál, bele foti osan husi Fundu Rezerva ne’e.
Diploma refere ba modelu jestaun Fundu Rezerva Seguransa Sosiál (FRSS) hatuur ho aspetu tuir mai, FRSS permite rai osan restu ka saldu husi rejime kontributivu hanesan kontribuisaun no prestasaun kada tinan.
Verba hirak ne’ebé akumula iha FRSS iha futuru, atu selu los de’it ba prestasaun sosiál ba ema ne’ebé kontribui ba Rejime Kontributivu;
FRSS pertense ba sistema seguransa sosiál, nune’e integradu iha perímetru orsamentu seguransa sosiál, no FRSS ne’e autonómu no iha modelu rasik ba jestaun, no Banco Central Timor-Leste (BCTL) mak responsável ba FRSS nia jestaun operasionál, liuhusi akordu ida ne’ebé sei asina ho Institutu Seguransa Sosial.
